Добивај вести на Viber
Новата фабриката за автомобилски делови „Кромберт и Шуберт“, инаку германска инвестиција во индустриската зона Жабени во Битола денеска и официјално почна со работа. Германците овде инвестирале 2о милиони евра, а иако сега работат околу 800 лица планот е бројката да порасне до вкупно 3 500 вработени.
Изградбата почна пред една година, а објектот има четири деловни единици, односно по една за производство на кабли, мрежи, пластична технологија и мехатроника. Производството според планот треба да оди за извоз, кај европските производители на автомобили како БМВ или Ауди.
Црвената лента помеѓу станатите ја сечеше и премиерот Никола Груевски, кој истакна дека Владата направила се што може за индустриската зона „Жабени“ да профункционира, па оттука, додаде, придобивките од влезот на „Кромберг и Шуберт“ во Македонија се неспорни.
„Целиот пелагониски регион веќе ги почувствува придобивките од оваа фабрика. Во изминатиот период имаше голем број огласи за вработување и моментно во работен однос во фабриката се повеќе од 800-ини луѓе. До крајот на оваа година се очекуваат уште 200 нови вработувања, следната уште 1.000 вработувања и постепено до крајот на 2015 година да се заокружи бројката од над 2.500 нови работни места“, рече Груевски.
Тој оцени дека во последните години ова е најголемата гринд-филд инвестиција во Македонија, а значајно е тоа што компанијата е извозно ориентирана и треба да ги зацврсти економските и политичките односи со Германија.
„ Дополнително значење на оваа инвестиција и дава фактот што „Кромберг и Шуберт“ е компанија која повеќе од еден век опстојува во автомобилската индустрија, компанија која е почитувана и силно етаблирана на светскиот пазар што е одлично за имиџот на нашата држава како поволна и атрактивна бизнис-дестинација и затоа верувам дека присуството на „Кромберг и Шуберт“ ќе повлече и други слични компании да го насочат својот интерес за инвестирање во Република Македонија,“ смета премиерот.
Германската компанија има повеќе од 10 илјади вработени низ цел свет кои произведуваат високо технолошки производи и опрема за автомобилската индустрија.