Се прошири листата на советници и надворешни соработници во канцеларијата на Заев: Плати до 55 илјади денари

Добивај вести на Viber

Листата на советници во канцеларијата на премиерот Зоран Заев се зголеми од 23 на 29 со последното ажурирање што го направи Владата. Сега таму има седум нови лица кои добиваат плата од 55.268 денари, а во меѓувреме еден советник го нема на списокот во однос на оној првобитниот.

Поранешниот министер без ресор Аксел Ахмедовски сега е советник за решавање на правни прашања и постапки, Зоран Ѓорѓиев, доскорешниот генерален директор на „Македонски шуми“, е советник за шумарство, водостопанство и спроведување на реформи во шумарството и водостопанството, додека Зоран Атанасов, кој до пред извесно време беше директор на Агенцијата за храна и ветеринарство дава совети кај премиерот за земјоделство, безбедност на храна, ветеринарна и фитосанитарна политика. Водителката Елена Митева сега е советник за организација на медиумски активности. Сите за своите совети месечно ќе бидат платени по 55.268 денари.

Додадени се активистката Силвија Митевска, како советник за спорт, екс-директорот на акционерското друштво за аеродормски услуги Виктор Петрушевски сега е советник за локална самоуправа, екс-министерот за дијаспора Едмонд Адеми е советник за надворешни работи. Исто и тие ќе ја добиваат истата сума. На листата повеќе ја нема Тања Чачарова Илиевска, која на Заев му беше советник за правда.

Со тоа листата на ангажирани во премиерската канцеларија се зголеми од 54 на 66 лица. Како што беше објавено од Владата, достапна за јавноста ќе биде само висината на надоместоците што им се плаќа на советниците на премиерот Заев. Ова не важи за државните советници, кабинетските службеници, раководителите на одделенија и соработниците. Не е позната ниту платата на поранешниот генерален секретар на Владата, Драги Рашковски, кој сега е на оваа листа како секретар за мониторинг и поддршка на институциите при реализација на програмата за работа на Владата, заедно со неговата помошничка Елена Паговска Пелтековски.

Нови три имиња има и на листата на надворешни соработници во канцеларијата на Заев. Спасе Додевски за 46.000 денари е надворешен соработник за унапредување на образованието, здравствената и социјалната заштита. Драган Василевски за 40.000 денари е надворешен соработник за одбрана, а за истата сума Дејан Николовски е за инвестиции помеѓу општините и Владата.

А.К.