Се спојуваат двете најголеми грчки банки

Добивај вести на Viber

Најголемата грчка банка „National Bank of Greece“, објави дека доставила понуда за спојување со нејзиниот најголеми конкурент во земјата „Eurobank“, соопштија светските агенции. Според предлогот за спојување, акционерите на „Eurobank“ ќе добијат по 58 акции од новата банкарска групација за секои 100 акции што ги поседуваат во моментов. Грчките банки се силен притисок за спојување, откако претрпеа големи загуби од тригодишната криза и од отпишувањето на дел од грчкиот долг. „Понудата за спојување има за цел создавањето на голема банкарска група во Грција, која ќе го стабилизира грчкиот банкарски систем и ќе ги обезбеди потребните финансиски средства за структурни промени во грчката економија", изјави претседателот на„ National Bank of Greece“, Јоргос Заниас. Во петокот, грчката берза привремено ја прекина трговијата со акциите на двете финансиски институции по информации во медиумите за нивното евентуално спојување. Со обединување на двете банки ќе се создаде најголемата институција во Грција на пазарот на кредити, депозити и со нараспространета мрежа филијали. Новото, заедничко кредитно портфолио ќе изнесува 109 милијарди евра, 89 милијарди депозити и 178 милијарди евра средства. Само во Грција групацијата ќе брои 944 филијали. Ова неделава е втора најава за голема банкарска зделка во Грција.  Пред неколку дена стана јасно дека француската банка „Credit Agricole“  ја избрала Алфа Банка како најдобар понудувач за грчката банка Емпорики. Во наддавањето за Емпорики учествуваа исто така и „National Bank of Greece„ и „Eurobank“.