Се токми проектот за изградба на Панорамското тркало високо колку 20 катна зграда!

Добивај вести на Viber

Реализацијата на еден од крупните проекти на Градот Скопје, Панорамското тркало влегува во завршна фаза. Од Градот велат дека во моментов интензивно  се работи на изведбеното решение на овој проект.  Градските власти во септември лани го потпишаа договорот за изработка на основен проект за Панорамското тркало со придружни објекти и мост, со австриската компанија „a2 Hotelconcept GmbH“, во висина околу половина милион евра, пари планирани во годинешниот градски буџет толму за оваа намена. Австријците се обврзаа во рок од 8 месеци да ја изработат потребната документација за започнување на градежните активности.

- За проектот Панорамско тркало, во моментов,  се изработува изведбено решение. По изработката на изведбениот проект ќе се пристапи кон разработување на сите релевантни модалитети за реализација на проектот, објаснуваат од Градот Скопје

Засега сеуште нема проценка колку ќе чини вкупната инвестиција, тоа ќе се знае по изборот на изведувачот. Идејното решение за изградба на тркалото се избра лани, но претходното конкурсот неколку пати се поништуваше бидејќи се додаваа нови работи. На крајот се избра трудот на австриските архитекти од студиото „ Massabni architects GmbH“, кои на јавноста и се познати и по идејните решенија за хотелот Мериот што се гради на плоштадот Македонија . Според проектот Панорамското тркало со придружни елементи ќе биде високо 60 метри, а ќе се гради на мост на реката Вардар во делот помеѓу Музејот на ВМРО и Стариот театар. Идејното решение предвидува целосно уредување на простор, кафе-бар, историски вагони од кој посетителите ќе имаат поглед на целиот на градот од 60 метри, поточно комплетниот изглед на тркалото како што тогаш објасни австриската компанија на својата интернет страница е инспириран од историските симболи за Македонија. Градот Скопје освен за изработката на изведбеното решение, е задолжен и за издавање на одобрението за градба. Соинвеститорот треба да го изгради тркалото заедно со придружните елементи и мостот и со него да стопанисува, да наплаќа билети од неговото функционирање и да го одржува во следните 35 години. Предлогот за распишување на тендер за соинвеститор за изградба на Панорамско тркало на една од последните седници на стариот Совет на Град Скопје, беше симнат од дневен ред поради пропусти од технички карактер во документацијата за  проектот. Тогаш опозицските советници побараа градските власти комплетно да се откажат од овој проект, но тоа не се случи. Жолчни расправи се водеа на седниците меѓу градските советоници од опозицијата и влкадејачката коалција за реализацијата на овој проект.

- Тоа е еден од проектите од Скопје 2014, и како таков не само од оваа седница треба целосно да се тргне . На Скопје не му требаат такви екскурзии , оти има поважни проблеми за решавање од Панорамското тркало.  Скопје има потреба од други мостови, а не од изградба на мост на реката Вардар за на него да се направи Панорамско тркало, тоа е небулозно и Градот треба да се откаже од овој проект, изјави на една од седниците Драги Давчевски, советник од СДСМ во Градот Скопје.

Засега не е познато кога Предлогот за распишување на тендер за соинвеститор за изградба на Панорамско тркало повторно ќе биде ставен на дневен ред на некоја од седниците на Градскиот совет. Ј.С