СЕКОЈ СИ ГИ ПУШТА НОЗЕТЕ КОЛКУ ШТО МУ Е ЧЕРГАТА: За Нова година многумина ќе бидат дома, а некои ќе патуваат во Мексико, Дубаи, Египет

Добивај вести на Viber

И овие празници граѓаните ќе ги прослават во согласност со можностите. Многу луѓе Новата година ќе ја дочекаат дома, но дел од населението може да си дозволи и патувања во Мексико, Дубаи, Египет или пак Париз, Прага, Белград. За далечните дестинации, патувањата по лице чинат и до 2.000 или 2.500 евра. Од туристичките агенции велат дека оние граѓани кои се финансиски моќни, не штедат на патувања и сакаат да избегаат во далечни земји каде има и потопло време. Резервираат аранжмани кои траат и по 7 дена.

Сепак, голем дел од граѓаните сакаат да патуваат, но признаваат дека немаат можности, поради ниските примања. За Нова година ќе подготват побогата трпеза од вообичаено и ќе бидат во кругот на семејството.

„Дома ќе седиме со сопругата. Веќе 5-6 години не сме биле никаде за Нова година. Ќе потрошиме скромна сума на пари“,  вели Борче Петрушевски, граѓанин.

Има и луѓе кои со децении се дома за празниците.

„Јас 20 години ја чекам Новата година дома. И сега ќе бидам дома. Народот нема работа и нема пари“, рече Јулија Славковска, граѓанка.

Друга соговорничка вели дека ќе биде дома, но има желба за празниците да замине во Србија ако не може подалеку. 

„Јас оваа година ќе бидам дома, но кога би можела би отишла во Нови Сад во Србија. Ми се допаѓа градот, народот, културата, убаво е. Нема финансии, нема стандард инаку луѓето би отишле некаде, зошто да не?“, додава Нада Антиќ, граѓанка.

Психолог Лариса Стојковиќ Трајкоска вели дека класните разлики во општеството растат, при тоа некој може да си дозволи да патува на далечни дестинации, а некој да остане дома за Нова година. Кој како ќе прослави вели дека е личен избор, поттикнат од финансиската моќ, но и психичките процеси кај човекот.

„Нова година е празник кој секој поединец го празнува онака како што го сфаќа и доживува. Секој е потребно да остане доследен на својата желба. Секој од нас во општествената структура, внатре во која живее, зазема одредено место, општествена позиција. Секој поединец зазема одредено место и на пазарот, во улога на потрошувач. Ние сите живееме во комплексно опкружување, во кое сме изложени на  бројни надворешни влијанија, кои може да се класифицираат како општествени фактори кои влијаат во донесувањето одлуки за купување, исто како што врз нашите одлуки делуваат нашите лични фактори (мотиви и мотивација, перцепција, ставови, црти на личноста, вредносен систем, животен стил, знаењето и психолошките процеси). Општествената позиција или желбата на поединците да припаѓаат на одредена класа, има директно влијание на однесувањето на поединците како потрошувачи, без разлика дали се работи за секојдневни или купувања за празници“, вели психологот.

Таа додава дека за време на празниците, но и преку целата година, треба да си дозволиме да се опуштиме, да им дадеме значење на парите, во рамки на своите можности, така што ќе ги потрошиме за работи кои ни нудат поквалитетен живот. Советува празниците да ги поминеме во благосостојба и спокој, а додава и дека прегратката е бесплатна и незаменлива.

Според податоците на Државниот завод за статистика (ДЗС) лани во просек секој член од домаќинствата трошел по 2.684 денари по ресторани и хотели. Податок објавен во 2014 година покажува дека Македонците во просек за Нова година трошеле по 90 евра.

foto freepik.com/fotomaximum