Што да очекуваат акционерите на „Фершпед“ годинава?

Добивај вести на Viber

Веројатно најдобра вест за акционерите и потенцијалните инвеститори е тоа што кредитните обврски на „Фершпед“ лани се намалени за 80 проценти, а неговите вкупни обврски се намалени за 16 отсто и се помалку од 4,8 милиони евра. Приходите на „Фершпед“ годинава се проектирани со раст од 3 проценти до износ од 85 милиони евра

Најзначајна новина во најава од финансискиот план на „Фершпед“ за 2025 година е тоа што компанијата ќе вложи половина милион евра во своите објетки и во нова и современа опрема. Ова го пишува во дописот со наслов „Финансиски план“ објавен на веб страницата на Македонската берза за хартии од вредност.

Освен ова „Фершпед“ декларира дека годинава очекува неговите приходи да пораснат за 3 отсто. Но истовремено со тоа очекува и расходите на компанијата да се зголемат до 3 отсто. 

Во најавата е наведено дека се очекува и благ раст на оперативната добивка на најголемата македонска компанија специјализира за шпедитерски услуги.

Менаџментот на друштвото најавува дека континуирано ја следи макроекономската состојба и дека нивен приоритет е одржување на тековната ликвидност и финансиската стабилност на компанијата.

Оперативната добивка на „Фершпед“ (консолидирана) лани изнесува 2,5 милиони евра. Таа е резултат на вкупните приходи кои изнесувале 80,8 милиони евра и се за 6 отсто повисоки од претходната 2023 година. Значајно е да се каже дека финансиските приходи и покрај тоа што во вкупните приходи се помалку од 1 отсто, сепак се зголемени за 50 отсто во споредба со 2023 година.

Лани и оперативните расходи пораснале за 6 отсто и тие изнесувале 78 милиони евра.

Веројатно најважна позитивна вест за акционерите на „Фершпед“ и за неговите потенцијални инвеститори е тоа што компанијата лани успеала да ги намали за 80 отсто своите обврски по кредити. На крај на 2024 година тие изнесувале нешто над 21.000 евра. Вкупните обврски на „Фершпед“ на крај на ланска година  изнесувале помалку од 4,7 милиони евра и биле намалени за 16 отсто во однос на 2023 година.

Р.Ф.