Добивај вести на Viber
Семејството Матоши од косовско Гњилане го обвинува локалниот имам Зекри Ќазими дека го поттикнувал нивниот син да замине и да му се приклучи на џихадот во Сирија, каде што неодамна бил убиен.
Петриот Матоши, кој имал 18 години, бил убиен во текот на борбите за Исламска држава во Ирак и Сирија, на страна на милитантната организација ИСИЛ која се бори за остварување на оваа цел.
Неговиот татко бил против Петриот да замине во војна и сигурна смрт.
„Да го дадеше својот живот во борба за албанските територии, јас не би пуштил ниту една солза“, изјавил таткото на Петриот, Рамадан, за приштинскиот весник „Коха“.
Тој ги повикал државните институции на Косово да откријат како неговиот син отпатувал најпрвин за Турција, а потоа и во Сирија, и кој го финансирал неговото заминување.
Од „Коха“ го контактирале и прозваниот имам Ќазими, кој само кратко кажал дека таткото на младото момче со своите обвинувања треба да се обрати на суд.
Косовската полиција денескаво масовна акција уапси 40-тина лица - повратници од борбите во Ирак и Сирија, со образложение дека подготвувале напади и претставувале закана за националната безбедност на Косово.
Меѓу останатото, осомничените терористи се товарат дека подготвувале да извршат напад за време на еден поголем културен настан на Косово, на кој се очекувале и голем број гости од странство.
Министерот за внатрешни работи во заминување Бајрам Реџепи изјави дека акцијата била спроведена по повеќемесечна истрага и додаде дека „ова е доказ дека Косово нема да биде лесен терен за радикални верски екстремисти“.
И премиерот во заминување Хашим Тачи нагласи дека апсењето е доказ за посветеноста на косовската Влада да се справи со оваа појава. „Косово нема да биде плодна земја за непријателите на евроатлантските вредности, човековите права, целосните верски слободи и на уставно загарантираниот секуларен систем“, напишал Тачи на Фејсбук.