Семејството што загина со „цесната“ тренирале и го помагале уметничкото лизгање, ќе има турнир во нивна чест
Објавено во: Балкан 07 Април, 2019
Турнир по уметничко лизгање во „Зимскиот дворец“ во Софија се одржува денес во чест на бугарското семејство кое загина со „цесната“ што се сруши на планината Јакупица во лет од Охрид до Софија. Целото семејство учествуваше активно во програмата на нашиот клуб, изјави нивната инструкторка Цветелина Јанкова
Двете ќерки од познатото семејството тренирале уметничко лизгање и нивните пријатели одлучија да организираат натпревар во нивна чест. Јанкова за Bulgaria ON AIR изјави дека сите се шокирани од трагичната смрт на семејството. Таа додаде дека таткото на децата Ѓорѓи спонзорирал дел од настаните во кои учествувал нивниот тим.
"Во натпреварот ќе учествуваат голем број на настапувачи. Сите ние сме многу тажни поради овој трагичен инцидент. Затоа и решивме да го посветиме овој турнир за нив. Турнирот е во сеќавање не само на Дејана и Гергана, но и на Георги и Калина. Тие беа дел од нашиот клуб долги години. Георги учествуваше во спонзорирање на наши учества на други натпревари. Тој беше исклучително благороден човек. потресени сме од она што се случи ", изјави инструкторката на двете девојчиња.
За еден месец треба да заврши истрагата и да се соопштат заклучоците за причината за падот на „цесната“ која најверојатно се сруши поради лошите временски услови.