Сет мерки за помош: Пари, облека и покуќнина за настраданите во поплавите

Добивај вести на Viber

Со цел ублажување на последиците од поплавите кои изминатава седмица ја зафатија Македонија, од Буџетот ќе бидат издвоени по 15.500 денари, еднократна неповратна помош за секој дом кој бил оштетен во водената стихија. Според најавите, парите треба да бидат префрлени до вторник на трансакциска сметка на највозрасното лице во семејството.

Како што денеска појасни владиниот портпарол,  Александар Ѓорѓиев, викендов претставниците на подрачните единици на МТСП и на Црвениот крст ќе ги посетат погодените домаќинства и ќе направат попис на нивните потреби.

„Сакаме да потенцираме дека оваа еднократна помош е интервентна и дека таа не го анулира делумниот надомест на штети кој ќе се исплати врз основа на проценка на општинските комисии за штети согласно Законот, изјави Ѓорѓиев.

Владата одлучила и целата количина на облека и обувки со кои располагаат Царинската управа и Агенцијата за управување со одземен имот во наредните денови да се подели на лицата во настраданите подрачја од поплавите.

Ѓоргиев исто така информираше и дека на ист начин како за облеката, се прават списоци и за покуќнина која во текот на утрешниот ден ќе им се дели на граѓаните од настраданите подрачја. Во меѓувреме, откако водата се повлече се работи на расчистувување на теренот и се прават обиди за санирање на штетите од поплавите.