Штерјо Наков претседател на Надзорен, Иван Петровски нов шеф на Управниот одбор во Фершпед!

Добивај вести на Viber

Иван Петровски, долгогодишен вработен во Фершпед е новиот претседател на Управниот одбор на Фершпед. Акционерите го избраа Петровски откако на крајот на март од таа позиција најави дека ќе се повлече Штерјо Наков, објави Дневник. Петровски седнува во фотелјата по повеќегодишно искуство како вработен во компанијата. Избрани се и другите членови на Управниот одбор, а меѓу нив е и еден од синовите на поранешниот директор, Драган Наков. Друштво во одборот ќе им прават Зоран Арнаутов, Цаца Зикова, Зоран Тодоровски и Александар Илијевски, вработени во компанијата. Новиот директор Петровски поседува 0,11 проценти од компанијата, Наков е сопственик на 11,83 проценти од капиталот, акции кои всушност му ги подари татко му Штерјо Наков. Зоран Арнаутов има 0,02 отсто сопствеништво во „Фершпед“, Зикова, 0,16 проценти, а Тодоровски 0,98 отсто. На крајот на март „Фершпед“ објави дека по 20 години на менаџерските позиции, Штерјо Наков и неговата долгогодишна соработничка Kираца Трајковска ќе бидат членови на Надзорниот одбор на компанијата. Новиот состав на овој одбор веќе е избран, а освен нив во надзорниот членуваат и Виолета Тататабитовска и Невенка Ристовска. Старо-нови членови на Надзорниот одбор се Леонид Наков и Стојан Настоски. По објавата се шпекулираше дека местото претседател на Управниот одбор на компанијата ќе му припадне на синот на Наков, но тоа не се реализира. Надзорниот одбор е тело што ја контролира работата на Управниот одбор, ниту една одлука всушност нема да се носи без одобрување на членовите на овој одбор, односно на старото раководство.