Што им порача Тоскас на пратениците на Златна зора, Нова демократија и Комунистичката партија за Македонија?

Добивај вести на Viber

Известувачот од владејачката СИРИЗА на Комисијата за национална одбрана и надворешни прашања во грчкиот парламент, Никос Тоскас ги повика пратениците да го прифатат законот за ратификација на Протоколот за НАТО. 

Тоскас, за нацрт законот за ратификација на Протоколот за членство во НАТО, вели дека „се спроведуваат чекорите и обврските на грчката страна согласно предвиденото од веќе одобрениот од Парламентот, Договор од Преспа“  и им се обрати на сите пратеници независно од партиската припадност и ставовите, да гласаат „за“, јави дописничката на МИА од Атина.

Пратеникот од СИРИЗА кажа дека главниот критериум за гласање на Протоколот е „да размислиме ние, како претставници на народот и на нацијата, како сакаме соседната земја да се вклучи во глобалниот систем и локално на Балканот под постоечките меѓународни корелации, со реализам и без апстрактни форми и идеали“.

„Ги повикувам сите колеги, независно од партиската линија и послушност, да го прифатат овој нацрт договор кој е обврзувачка последница и предуслов од Договорот од Преспа, што ги имплементира нашите национални интереси, кој ја стабилизира и надградува улогата на нашата земја во поширокиот регион на Балканот и на Источниот Медитеран“ – изјави Тоскас.

Тој им се обрати на пратениците од Комунистичката партија на Грција, од Златна зора и Нова демократија, за нивните позиции во однос на Договорот од Преспа.

Како што е најавено, со ратификацијата на протоколот за НАТО во грчкиот Парламент, македонската Влада веднаш треба да ги извести сите меѓународни организации и држави дека земјата има ново име Република Северна Македонија.

Македонија вчера го потпиша Протоколот за НАТО.