Што им порачува независната ревизија на малите акционери во кумановски ФЗЦ „11 Октомври“?

Добивај вести на Viber

Нов момент во нашата 25 годишна корпоративна историја : околу 1.500 домашни физички лица – мали акционери во ФЗЦ „11 Октомври“ идниот петок ќе одлучуваат за зделка вредна 50 милиони евра во која се вклучени ФЗЦ и нивниот најголем акционер Тони Каранфиловски преку три семејни фирми од кои две се акционери и во ФЗЦ поседуваат речиси 60 отсто од акциите

Независнаа ревизија им препорачува на малите акционери на кумановската индустрија за заварени цевки и профили да гласаат позитивно за предлогот за голема зделка со заинтересирани страни вредна 50 милиони евра во која гаранции кон банката за работата даваат три друштва кои се во директна или семејна сопственост на Тони Каранфиловски.

На 18 декември е закажано акционерско собрание на АД „11 Октомври“ од Куманово на кое акционерите треба да гласаат за предлогот за зделка со заинтересирана страна чија вредност достигнува 50 милиони евра. Станува збор за изработка на производи во ФЗЦ „11 Октомври“ за  кои материјал набавува и потоа ги откупува еден од акционерите т.е. „Квалитет – пром“ од Куманово и вредноста на тие трансакции треба да изнесува над 40 милиони евра. „Детоил“ од Куманово во зделката учествува како продавач на нафтени деривати на ФЗЦ вредни 2,5 милиони евра, а исто така ќе бидат гаранти за ФЗЦ „11 Октомври“ пред една деловна банка за кредит во износ од 2 милиони евра. Во зделката учествува и кумановската градежна фирма „Рапид Билд“ со договор за деловно техничка соработка со фЗЦ вреден 2,5 милиони евра. Четирите друштва меѓусебно се гаранти за два кредити во вкупна вредност од 4 милиони евра пред една домашна деловна банка.  

Оваа процедура е законски задолжителна и според неа мора да се ангажира независна финансиска ревизија за да изготви „Извештај за ангажман за уверување во постапка за гласање за голема зделка со заинтересирана страна“. Ангажирана е „Бенд ревизија консалтинг“ од Тетово која утврдила дека зделката е во согласност со законските прописи,  дека зделката е фер од аспект на вредност според пазарните услови. Како ризик фактори до малите акционери тие ги воочиле следниве: флуктуација на цени на готови производи и на суровини се резултат на глобална понуда и побарувачка за челик, ограничена конкуренција со капацитети за производство на челични производи во земјава како и можна зависност од мал број добавувачи и купувачи во земјава меѓу кои најголем е „Квалитет Пром“ нивниот најголем поединечен акционер.

Целиот извештај на независната ревизија е достапен за сите заинтересирани на следниот линк https://www.seinet.com.mk/Default.aspx?lang=MK&docID=53014

Во ФЗЦ „11 Октомври“ Куманово најголеми акционери се : „Квалитет ПРОМ“ фирма во сопственост на Тони Каранфиловски, која поседува 52,4 отсто од ФЗЦ и „Рапид Билд“ која поседува 9,15 отсто од акциите со право на глас. Во „Рапид Билд“ сопственици се „Квалитет Пром“ и “Детоил“ (во која сопственици се браќата Дејан и Тони Каранфиловски) . Околу 35 отсто од акциите во ФЗЦ „11 Октомври“ поседуваат речиси 1.500 домашни физички лица – мали акционери кои всушност на претстојното собрание ќе го имаат решавачкиот глас за претстојната зделка вредна 50 милиони евра.