Што предвидуваат новите правила за градење?

Добивај вести на Viber

Со новите правилници за енергетска ефикасност што до крајот на јуни треба да бидат објавени во Службен весник, секој нов објект што ќе се гради ќе мора да добие сертификат за енергетски карактеристики на зградите. Сертификатите ќе ги издаваат посебни фирми, што ќе добијат соодветни лиценци. Според информациите на Фактор, ќе има два вида на сертификати - еден за станбени згради и еден за нестанбени згради. Според новите правила на игра што наскоро ќе стартуваат во градежниот бизнис, секој нов објект на видливо место ќе треба да го истакне сертификатот за енергетски карактеристики. Сертификатите за двата вида на објекти ќе изгледаат како на сликите подолу, но ќе содржат и дополнителни податоци. Станбените и нестанбените згради и градежни единици се поделени во осум енергетски класи, и тоа: А+, А, B, C, D, E, F и G. Класата А+ претставува енергетски најповолна, додека класата G е енергетски најнеповолна класа. Во зависност од категориите на објекти, и во зависност од тоа дали се работи нови градби или за значителни реконструкции на постојни објекти – се определува која е најниската дозволена енергетска класа. Останатиот дел од Сертификатот за енергетски карактеристики на станбени и нестанбени згради ќе содржи дополнителни податоци за зградата, како што се вид на зградата и локација, потоа дали станува збор за нова или реконструирана зграда, година на завршување со градењето на зградата, година на завршување на техничките системи, кој ги изведувал работите. Ќе мора да бидат внесени податоци за начинот на ладење, вентилација (природна - принудна без враќање на топлина, принудна со враќање на топлина). Дали во зградата се користат  обновливи извори на енергија.“ Меѓу податоците што ќе треба да се наведат во Сертификатот за енергетски карактеристики ќе терба да бидат и следните: „Пресметана годишна потрошувачка на финална енергија по категории на потрошувачи: Греење, ладење, вентилација, топла вода, осветление, помошна енергија, вкупна потрошувачка. За секоја категорија на потрошувачи треба да се даде процентуалното учество на одделни извори на енергија (гас, нафта, електрична енергија, биомаса и друго). Пресметана годишна потрошувачка на примарна енергија по категории на потрошувачи: Греење, ладење, вентилација, топла вода, осветление, помошна енергија, вкупна потрошувачка. За секоја категорија на потрошувачи треба да се даде учеството на одделни извори на енергија (гас, нафта, електрична енергија, биомаса и друго).“ Сертификатот за енергетски карактеристики за постојните згради содржи предлог мерки за подобрување на енергетските карактеристики на зградата, кои се економски оправдани. За новите згради сертификатот содржи препораки за користење назградата од аспект на заштеда на енергија и топлинска заштеда. Во сертификатот ќе треба да биде наведена и климатска зона во која се наоѓа објектот вклучувајќи ги бројот на топлински степен денови. Подрачјето на Македонија е поделено во три климатски зони според вредностите на топлинските степен. Трите климатски зони се:

• Климатска зона 1, за градови и населени места со топлински степен денови во границите (1.900 – 2.400) [Kden];
• Климатска зона 2, за градови и населени места со топлински степен денови во границите (2.401 – 2.650) [Kden]; и
• Климатска зона 3, за градови и населени места со топлински степен денови поголеми од 2.650 [Kden].

Населено место	Топлински степен денови	Населено место	Топлински степен денови
Берово	2.932	Крушево	3.735
Битола	2.635	Куманово	2.552
Велес	2.303	Охрид	2.501
Гевгелија	2.080	Прилеп	2.629
Гостивар	2.728	Скопје	2.536
Д.Капија	2.241	Струга	2.636
Кичево	2.632	Струмица	2.364
Кочани	2.271	Тетово	2.662
К.Паланка	2.757	Штип	2.388

  Новите правила ќе важат за едносемејни и повеќесемејни згради за домување (до 2 станови), станбени згради, административни и комерцијални згради, згради во образовниот сектор,згради во здравствениот сектор, хотели и ресторани, згради за спортски активности, згради за културно-уметнички активности и забави, згради за трговија на големо и мало, други видови на згради коишто се загреваат на температура повисока од 12 0С. Новите правила нема да важат за

• Згради официјално заштитени од државата, како дел од определена околина или поради нивната посебно архитектонско или историско значење;
• Згради кои претставуваат недвижно културно наследство и споменички целини прогласени со закон или друг акт за заштита на културното наследство кое е од особено значење и меморијални споменици;
• Згради за верски обреди или други религиозни активности;
• Згради кои се користат привремено, со време на користење од две години или помалку, производни хали, индустриски згради, работилници, магацини и нерезиденцијални згради за земјоделска дејност кои имаат мала побарувачка на енергија;
• Згради за домување кои се користат или се направени со намера да се користат за период помал од четири месеци во текот на годината или за период помал од 25 % од времетраењето на зимската и летната сезона, со очекувана потрошувачка на енергија помала од 25% од потрошувачката што се очекува при користење на зградата во текот на целата година; и
• Самостојни згради со вкупна плоштина на корисната подна површина помала од 50 m2.
• Згради за коишто не се издава градежна дозвола;
• Згради кои се градат врз основа на привремена градежна дозвола;
• Помошни згради на системите за електронски телекомуникации;
• Згради кои не се греат или се греат на температури до +12 оС; и
• Засолништа.

При градба на нови или значителна реконструкција на постојни згради или градежни единици во сопственост на лицата од јавниот сектор, згради во здравствениот сектор, ученички и студентски домови,детски градинки, установи за социјални грижи, спортски сали и воени касарни, треба задолжително да се вградат сончеви колектори за топла вода, доколку тоа е економски исплатливо. Н.С.