„Симпо“ рестартиран, бара добавувачи и во Македонија

Добивај вести на Viber

Некогашниот гигант за мебел „Симпо“ излезе од блокада, со што се создаваат услови одново да започне производството во одредени фабрики веќе од 15 септември. Први се очекува да бидат рестартирани фабриките за тапетарски производи во Врање и за душеци во Бујановац. „Останатите фабрики постепено ќе стартуваат со работа во зависност од динамиката на пристигнување на репроматеријалите од земјава и од странство. Во тек се интензивни преговори со добавувачите за репрограмирање на долговите што ги има Симпо и за редефинирање на условите за испорака во иднина“, вели генералниот директор Слаѓан Дисиќ. Веќе во текот на оваа недела „Симпо“ треба да го посетат потенцијални добавувачи на клучните репроматеријали од Македонија, Србија, Бугарија, Словенија и други земји, со кои ќе се дискутира за продолжување на соработката во иднина. Акционерското Собрание на „Симпо“ усвои одлука за претворање на даночниот долг, со која откако ќе ја потпише министерот за економија на Србија, државата ќе стане сопственик на удел од 80% во компанијата за производство на мебел, а претпријатието ќе се ослободи од долгот за неплатен данок. Државниот пакет акции потоа ќе биде понуден на продажба, а државата за тоа веќе води преговори со две сериозни странски компании. Основен услов за новиот стратешки партнер ќе биде неговата подготвеност да ја задржи целовитоста на „Симпо“ - препознатлив бренд од времето на поранешна Југославија, да ги задржи сите вработени, да изврши финансиска консолидација и техничка модернизација.