Добивај вести на Viber
Тинејџерот Виктор Мицула, син на романскиот тајкун Јоан Мицула „тежок“ 160 милиони фунти, на потежок начин научил дека не може да купи се со пари. Заради измама бил исфрлен од завршниот испит во средното училиште.
Осумнаесет годишниот Виктор на испитот стигнал во своето црно Ферари вредно 160 илјади фунти. На локалните новинари им се пофалил дека е „сигурен и добро подготвен“. Но, само еден час подоцна се појавил намрштен, влетал во друг автомобил Мерцедес кој го чекал пред училиштето и не кажал ниту еден збор.
Причината за неговиот бес во јавност излегла само неколку дена подоцна, кога резултатите од тестот биле објавени на училишната огласна табла - Мицула бил отстранет од испитот поради обид да препишува.
„Ова само покажува дека парите не можат да купат се. Но, мислам дека тоа нема да влијае на неговата кариера, бидејќи секогаш може да се вработи кај својот татко“, рекол еден негов колега.
Според правилата на романското Министерство за образование, заради обидот да препишува тој нема да може да го полага завршниот испит пред 2016 година.
Тинејџерот-препишувач го очекува наследство од неговиот татко Јоан Мицула, кој изгради деловна империја занимавајќи се со туризам, недвижности, медиуми и индустрија.
Испадите на разгалениот млад човек редовно ги полнат страниците на романските весници. На пример, тој често на училиште доаѓал со хеликоптер, бидејќи наутро сакал да поспие подолго. Со своето Ферари возел низ пешачка зона само за да стигне до продавница за накит со својата девојка, а бил фатен и за пребрзо возење за што возачката дозвола му била одземена на три месеци.
За ваквото однесување на тинејџерот многумина го обвинуваат неговиот татко, кој е познат по тоа што во се им удоволува на своите деца - синот Виктор и ќерката Оливија.