Синдикатот на МНР алармира за манипулации за изборите во дијаспората

Добивај вести на Viber

Синдикатот на македонската дипломатска служба денеска предупреди за партиска злоупотреба на амбасадите во пресрет на изборите и гласањето на дијаспората.

Според сознанијата на Синдикатот, државниот службеник вработен во Министерството за култура Дарко Стефановски допатувал во Париз на 9 ноември и бил во просториите на амбасадата заедно со партискиот тим на „помагачи”, на 10 и 11 ноември 2016 година, односно до крајниот рок за пријавување на гласачите од дијаспората.

„Упатениот “повик” од еден државен службеник вработен во Министерството за култура во кој главен “аргумент” за пријавување на нашите граѓани од дијаспората за претстојните парламентарни избори, па уште и каде се истакнува дека “Излезноста на овие избори е многу значајна од причина што од тоа зависи дали пратеник од дијаспората ќе имаме Македонец или Албанец”, е во најмала мера скандалозен и содржи јасни елементи на поттикнување верска и расна омраза и дискриминација, предупредуваат од Синдикатот. За разлика од 2014 година, овој пат вратите на амбасадата на Република Македонија во Париз му биле „ширум” отворени, а одделни вработени во амбасадата му овозможиле сесрдна логистичка поддршка, меѓу другото и користење на службените фиксни телефони на амбасадата, а со цел прибавување што поголем број пријави до крајниот рок. Ваквото овозможување и користење на амбасадата, претставува драстичен пример за злоупотреба на нашата дипломатија во партиски цели“ - пишуваат од Синдикатот.

Бараат случајот да се истражи и да се провери дали и како амбасадата била искористена.