СЈО незадоволни од условната бараат затвор за Ивона Талевска

Добивај вести на Viber

Специјалното јавно обвинителство не е задоволно од условната и парична казна изречена во првостепена постапка против новинарката Ивона Талевска за затајување данок преку нејзините фирми и пред Апелацискиот суд ја обжали одлуката барајќи ефективна затворска казна.

Освен затворска казна СЈО предлага да се зголеми и паричната казна за Талевска, како и за правното лице.

Уредничката на ТВ Сител, Ивона Талевска беше  осудена на условна казна затвор од две години доколку во наредните четири години го повтори делото, како и да ги врати сите пари утврдени во предметот „Тифани“ за кои е затаен данок. 

Според тогашната одлука на Основниот суд Скопје 1 Талевска не треба да помине две години во затвор доколку во наредните четири не стори ново кривично дело.

Судијката Софија Лаличиќ изјави дека наместо ефективна казна затвор судот се одлучил за алтернативна мерка, условна осуда за Талевска, поради нејзиното добро поведение и фактот што Талевска признала вина за даночното затајување.

Случајот „Тифани“ се однесува на кривично дело што траело од 2008 до 2014 година, при што Талевска како управителка на друштвото за консалтинг „Смарт ДООЕЛ“ и на „Смарт груп ДООЕЛ Скопје“ за тој период одбегнала да плати даноци, а во завршните сметки давала лажни податоци, при што затаила 2.314.463 денари или 37.634 евра преку фирмите и 1.040.840 денари или 16.924 евра личен данок.