Скопје ќе добие нови паркинг места, почна изградбата на катната гаража „Мал ринг“

Добивај вести на Viber

Почна изградбата на катната гаража „Мал ринг“ со што центарот на Скопје  за две години ќе добие уште 170 нови паркинг места. Катната гаража е во непоседна близина на Музејот на холокаустот. Во изградбата на катната гаража, за која денеска беше поставен темелник,  Акционерското друштво за  изградба и стопанисување со станбен и деловен простор, ќе инвестира 273 милиони денари. Новиот објект ќе опфаќа вкупна површина од 10.037 метри квадратни. „Мал ринг“ е последната катна гаража што почна да се гради од седумте  такви објекти што  пред две години заеднички ги најавија Владата, Градот Скопје и Општина Центар за средување на хаосот со недостиг од паркинг-места во центарот на главниот град. „За две години ја почнуваме последната  од седумте планирани  катни гаражи. Шест од катните гаражи веќе се градат. Една е пред пуштање, уште една ќе биде завршена целосно за два до три месеци и се надевам дека до крајот на годината ќе бидат готови уште една до две катни гаражи. Со задоволство можам да кажам дека  проектот е успешен, иако не се завршени за сите е обезбедена финансиска конструкција, склучени се сите договори и градбата тече без некои сериозни проблеми“, истакна на свеченоста за поставување на камен темелникот премиерот Никола Груевски. Тој нагласи дека локацијата на новата катна гаража ќе ја оправда инвестицијата бидејќи, како што рече, е во близна на главниот плоштад на Скопје, на плоштадот „Карпошово востание“ што се гради, на многу ресторани, на Градскиот трговски центар, на театарот што наскоро ќе биде  пуштен во употреба, на музеите, на многу државни институции и многу знаменитости вклучувајќи ја и старата скопска чаршија. Покрај функцијата за паркирање, новиот објект има и  мултифункционален деловен простор сместен во периферните делови, во  краците на приземјето и на двата ката. Паркирањето е сместено во кружно јадро и  се простира од кота – 3 метри  па се до кота + 20,70 метри. Објектот има едно подземно  ниво до кое се стигнува преку новопланираната улица во таа област. Паркирањето во оваа гаража, според проектот,  поради големината и типот на урбанистичката  маркица,  за разлика од останатите катни гаражи кои се градат, е решено во кружно јадро и е спирално, што на  објектот му дава специфичен облик. Изведувач на градежните работи е фирмата „Ламоне Мореда“, а проектант „ГМС Преоекст“ Скопје