Скроен планот за обнова на Трескавец, уште да се соберат пари!

Добивај вести на Viber

Се крои планот за обнова на манастирскиот комплекс Трескавец. На состанокот во Прилеп на кој присуствуваше и министерската за култура Елизабета Канческа-Милевска, беа конкретизирани чекорите за обнова на изгорените конаци.

„Прво ќе се расчистат изгорените ѕидови на конаците. Локалните власти заедно со Македонската православна црква ја организираат акцијата која е прв нареден чекор. Прилепскиот завод и музеј за рекордно време го направи идејниот проект. На манастирот ќе му се обезбедат: армирано бетонска конструкција со дрвена обмотка за да се задржи автентичноста на конаците, систем за дојава на пожар, хидрантска противпожарна мрежа  и каптажа и резервоар за собирање на водата. Потоа ќе се изготви  основниот проект кој ќе оди на ревизија. Откако ќе помине и таа фаза, ќе се распише тендерот за изведувач на работите“, изјави Канческа-Милевска.

Прилепската локална самоуправа најави дека заедно со МПЦ го почне да работи на обновата штом времето ќе го дозволи тоа. „Завршен е планот за демонтирање на опожарените ѕидови на конаците. Тие мора да се срушат зашто се опасни. Тоа ќе го направиме веднаш штом дозволат приликите зашто во овој момент кај манастирот  има снег. За ова локалната самоуправа од буџетот издвои еден милион денари“, изјави градоначалникот на Прилеп, Марјан Ристески. Од Министерството за транспорт и врски пак е дадена цврста гаранција дека изведувачот „Гранит“ до крајот на август ќе го изгради патото од 7,5 километри до манастирот за потоа да почне обновата на конаците. Хуманитарен концерт за манастирот Вечерва во Центарот на културата „Марко Цепенков" во Прилеп, ансамблот Танец одржува концерт. Гости се и  Блага Петревска и Сузана Спасовска. Влезницата чини 100 денари, а ќе може да донираат и оние што нема да присуствуваат на овој настан преку отворената телефонска линија на директниот телевизиски пренос. Во рамките на акцијата „Kултура во пресрет на манастирот Трескавец", Театарот комедија ќе ја одигра претставата Женидба во режија на Дејан Пројковски. Од локалната самоуправа исто така отворија сметка на која сите граѓани ќе може да донираат пари за обнова на Трескавец.