Славчо Попоски најави дека најмногу снег ќе наврне во западните делови
Објавено во: Македонија 18 Јануари, 2022
Метеорологот Славчо Попоски најави дека најмногу снег ќе наврне во западните делови, а порача граѓаните да внимаваат на голомразица.
Утре на големиот Христијански празник Богојавление – Водици и во четврток во текот на денот времето во Македонија ќе се задржи стабилно, суво и сончево. Наутро ќе биде многу студено и минималните температури ќе се спуштаат во интервалот од -10 до -2 степени, додека максималните ќе се искачуваат во интервалот од 2 до 9 степени.
„Под влијание на влажен и студен воздушен бран, во текот на ноќта четврток кон петок, како и во петок ќе има врнежи од снег, поинтензивни во западните предели каде снежна покривка ќе се формира и на пониските места, а на планините истата ќе се зголеми. Тенка снежна покривка ќе се формира и во останатите места, освен во Повардарието и во југоисточните предели, а ќе дува и умерен, повремено засилен ветер од северен правец, најизразен Долж Повардарието. Потоа за време на викендот се уште ќе има услови за локални слаби врнежи од снег. Наутро ќе биде особено студено и минималните температури понекаде ќе се спуштат под -15 степени, додека максималните ќе се искачуваат во интервалот од -6 до 2 степени. И во Скопскиот регион утре и во четврток времето ќе биде стабилно, суво и сончево. Во текот на ноќта четврток кон петок, а особено во петок ќе има повремени врнежи од снег, а ќе дува и умерен, повремено засилен ветер од северен правец. Наутро температурите ќе се спуштаат во интервалот од -7 до -4 степени, додека максималните ќе се искачуваат во интервалот од 0 до 4 степени“, вели Попоски.
Додава дека за време на овој влажен бран кој ќе ја зафати нашата држава, можно е накратко на некои ниски места да има врнежи од дожд и снег и истите набргу ќе преминат во врнежи само од снег. Порачува возачите да бидат крајно претпазливи доколку се движат низ планинските превои или одат кон скијачките центри. Крајно претпазливи да бидат и пешаците.