Случај „Бачило“: Ќе се продава имотот на Џемаили, вреди над 1 милион евра

Добивај вести на Viber

Десет станови во Скопје, и деловен простор кој беше сопственост на овчарот, Иснифарис Џемаили, кој стана познат по случајот Бачило се конфискувани и ќе се продаваат. „Врз основа на судската пресуда, Агенцијата за управување со конфискуван имот ќе конфискува станбен простор во кој се содржат 10 стана, сите лоцирани во една нова зграда во Скопје со вкупна површина од 910 метри квадратни, како и деловен простор со површина од 62 метри квадратни исто така во Скопје. Апроксимативно пресметаната вредност на вкупниот имот кој ќе биде конфискуван е над 1 милион евра“, појасни портпаролот на Владата, Александар Ѓорѓиев. Тој информираше дека претходно Џемаили 7 години со вешти правни процедури, не дозволил да му се конфискува огромен дел од имотот кој го стекнал на нелегален начин. Имено, по правосилната судска пресуда според која тој ја има оштетено државата за 44 милиони денари, Џемаили целиот свој имот го ставил под хипотеки кај други лица преку потпишување на фиктивни договори за заем, со цел да не може да му биде одземен. Сепак, појаснува Ѓорѓиев, Државното правобранителство успеало да докаже дека Џемаили го попречувал правото и со нелегални активности се обидел да ја изигра правдата, по што се создала можност државата да го конфискува неговиот имот.