Смее ли со акциите на Оилко да се тргува на Берза?!

Добивај вести на Viber

Најавата дека командитното друштво Оилко, ќе стартува на Берза покрена лавина прашања меѓу играчите на пазарот со хартии од вредност. Неофицијалните информации до кои дојде Фактор се дека Комисијата завчера писмено ја известила Берзата внимателно да ги разгледа прописите и правилата кога и која компанија може да тргува на Берза. Катерина Попоска Иако најавено, тргувањето со акциите на командитното друштво Оилко вчера не се одржа. На редовниот пазар не се тргуваше со акциите на дистрибутерот на нафтени деривати кој работи доминантно за Макпетрол. Како што веќе објави Фактор, командитното друштво со акции, Оилко, единствено од ваков вид во Македонија, а можеби и на Балканот од вчера требаше да излезе на Берза, да почна да ги нуди своите акции на редовниот пазар за хартии од вредност. Но, тргувањето најверојатно се уште е на “stand by“ откако почна поинтензивна комуникација меѓу Македонската берза и регулаторот на пазарот за хартии од вредност. По најавата од страна на берзата дека Оилко ќе тргува со акции, Комисијата за хартии од вредност (КХВ) испратила писмо до Македонската берза, во кое најверојатно се сугерира дека командитно друштво како Оилко не може да тргува на Берза и дека одговорноста за тоа ќе ја сноси Берзата. “Берзата е само регулирачка организација која треба да постапува согласно законите и правилата на пазарот за хартии од вредност“, кусо објаснуваат од Комисијата за хартии од вредност за Фактор. Од Берзата пак, не сакаат да ги коментираат неофицијалните информации, дека не е докрај јасно дали со акциите на Оилко смее да се тргува на пазарот за хартии од вредност. Тврдат дека од вчера Оилко веќе ги извади своите акции на Берзата. “Берзата ги извести своите членки дека од 15-ти ноември ќе се тргува и со акции на Оилко. Според Регистарот на Комисијата за хартии од вредност Оилко е командитно акционерско друштво и има посебни обврски за известување. Тргувањето со акциите на Оилко ќе биде на редовниот пазар“, велат од Македонска берза. За сега нема конкретно објаснување зошто вчера не се тргуваше со акциите на Оилко и дали можеби “преписката“ на линија-Македонска берза-КХВ ќе наложи поинаков епилог. Став нема ниту од Оилко за мотивите на менаџментот да  излезат на Берза. Која е компанијата ОИЛКО? Командитното друштво Оилко од 2007 година дистрибуира нафта и нафтени деривати за најголемиот дистибутер на горива во земјава, Макпетрол. Токму Макпетрол е основач и најголем акционер на Оилко со удел од 30%. Оилко пак, е најголем поединечен акционер во Макпетрол, со учество од 19,94% во капиталот. Генералниот директор на Макпетрол, Андреја Јосифовски, има 15% од акциите во Оилко, со што е најголем поединечен акционер во компанијата. Со тоа, Јосифовски управува и со Макпетрол и со Оилко. Оилко првите девет месеци ги заврши со 100.910 евра профит, наспроти добивката од 646.504 евра истиот период лани. Правните експерти велат дека во регионот не слушнале за пример на командитно друштво со акции, какво што е Оилко. “Со командитното друштво управуваат комплементарите. Командиторите немаат право да управуваат со друштвото. Командиторот учествува во покривање на загубите на командитното друштво до висината на запишаниот влог, ако поинаку не е определено во договорот за друштвото. Командиторот не е должен да ја врати примената добивка поради подоцнежна загуба на командитното друштво“, пишува во Законот за трговски друштва. Аналитичарите пак, објаснуваат дека командитното друштво со акции е друштво од еден или повеќе акционери кои можат да бидат командитори и комплементари, а нивната цел е стекнување профит. Членови на вакво друштво можат да бидат и фирми и поединци, со тоа што физичките лица можат да бидат само комплементари. Според податоците објавени од Комисијата за хартии од вредност, комплементари во Оилко се генералниот директор на Макпетрол, Андреја Јосифовски, и Саша Лекиќ. За да се биде член во едно командитно друштво не е потребна согласност од командиторите. ФАКТИ ЗА ОИЛКО:

• 663.124 евра дивиденда подели Оилко во јуни минатата година
• 250.300 евра е основачкиот капитал на Оилко во јануари 2007 година
• 21 менаџер на Макпетрол ја формираа Оилко