Сметката на Железница експресно деблокирана!

Добивај вести на Viber

Министерот Миле Јанакиески на денешната средба во Министерството ги извести железничарите дека сметката на МЖ инфраструктура веднаш ќе биде деблокирана. Тоа значи дека нема да се дозволи да не се исплатат платите, ниту пак посериозен застој во сообраќајот. Сепак, не се објаснува како за само неколку часа сметката на железница е деблокирана, откако претходно Агенцијата за регулирање на железничкиот сектор ја блокираше поради камата за ненавремено плаќање на долг од 2011 година, во вредност од околу два милиони денари. Од Агенцијата за регулирање на железничкиот сообраќај велеа дека само постапуваат по закон. Претходно првиот човек на МЖ Инфраструктура, Ирфан Асани, рече дека блокирањето на сметката е неосновано. - Ние со агенцијата се договоривме парите за  тековно одржување да ги плаќање сукцесивно.  За жал добивме едно извршено решение кое е нерелано затоа што се работи за некој измислен долг за некои камати за ненавремено плаќање на долг од 2011 година. Но ние  не можеме да прифатиме таков начин на присилно земање на пари, бидејќи не се работи за долг оти ние плаќаме постепено. Агенцијата треба да ги регулира и да овозможува исти права за сите оператори кои користат услуги на инфраструктура, но  во Македонија со промените на Законот за железнички систем, немаме либерализација на пазарот, односно  има само еден оператор, и оттука произлегува дека сега улогата на агенцијата е неважна, изјави Асани Синдикатот на Железничарите, пак објавија дека железничкиот сообраќај е под закана од целосен прекин доколку итно не се деблокира сметката на МЖ Инфраструктура. Во прашање беше доведена исплатата на платите и сините картони за вработените како и сите останати плаќања на фирмата. На средбата со Јанакиески е одлучено утре да продолжат разговорите, за да се надминат тековните проблеми, кои настанаа како резултат на денешната блокада, но и за останатите состојби во фирмата.