СНЕГ ВО АПРИЛ: Добро за Малешевијата, но не и за овошките ширум Македонија

Добивај вести на Viber

На 1 април се формираше дебела снежна покривка во земјава, а се најавуваат и ниски температури кои може да ги измрзнат овошките.

Сепак, овие снежни врнежи нема да им наштетат на овошните насади во Малешевијата, затоа што таму дрвцата уште не се расцутени.

„Овој снег нема да ги измрзне овошките во Берово и околината затоа што дрвцата во овој крај уште немаат цвет, но за другите места ќе биде лошо. Ако температурата падне до -1 степен, на удар ќе бидат кајсијата и црешата. Има најави дека на некои места температурата ќе се спушти и до -7 степени. Во Берово успеваат сливите, црешите, а јаболката се помалку застапени. Има и цреши, кајсии, но тоа се мал број на дрвца кои се засадени во дворовите. Дали снегот ќе предизвика штети зависи од тоа за каков снег се работи, дали е сув или важен снег, дали ќе имаме мраз или слана“, вели Весна Севдинска, агроном од Берово.

Иван Зафировски, агроном од Битола вели дека за оваа година завршено е со коскестото овошје.

„Кајсијата, праската, сливата е уништена во Пелагонија и во централна Македонија. Истото ќе се случи и со бадемот. Јаболката и крушите имаат шанса да ги „преживеат“ овие временски услови. Во Битола денес имаме над 20 сантиметри снег, така што родот на коскестото овошје годинава ќе биде минимален“, вели тој.

Утринските температури до сабота во поголем дел од земјава ќе се спуштаат под нула, но се очекува на места да се задржи снежната покривка. За време на викендот ќе има локален дожд.

Оваа зима беше сушна, но за сметка на тоа во март имаше обилни дождови, а сега во април имаме снег.