Добивај вести на Viber
Со отсликување на таванот на главната сала, Стариот театар треба да биде пуштен во употреба веднаш по одржувањето на локалните избори, на 27 март.
Дури 270.000 евра Министерството за култура ќе им плати на пет македонски уметници за да го насликаат таванот на главната сала на Сатриот театар со македонски мотиви. Сликарите Ѓорѓи Чулаковски-Џото, Синиша Стефановски Кашавелски, Константин Качев, Ема Петрова Николовска (идентично име и презиме има директорката на Конзерваторскиот центар?!) и академскиот сликар Златко Глигоров за своите ангажмани добиваат и различни хонорари. Најмногу пари за своето ремек дело ќе добие сликарот Гаврилов-75.000 евра, додека Кашавелски околу 71.000 евра, Чулаковски околу 49.000 евра, Качев 46.600 евра и Николовска 24.500 евра.
Министерството за култура ги избра петте домашни уметници да го насликат плафонот на главната сала на Стариот театар во постапка со преговарање, без претходно објавување на тендер, покажуваат податоците од Бирото за јавни набавки.
Стариот театар ќе ја чека светлоста на денот по изборите
Според последните информации, Старо-новиот театар ќе се отвори на 27-ми март годинава, на Светскиот ден на театарот. Објектот, според министерката за култура Елизабета Канческа-Милевска е во зарвшна фаза, се работи на ентериерното уредување и доколку дозволат временските услови, ќе се отвори и промовира на 27 март.
“Нашата национална установа, Македонскиот народен театар, веќе интензивно работи на премиерната претстава, по текст на Јордан Плевнеш, со која свечено ќе биде отворен театарот“, изјави неодамна министерката.
На горната површина на покривот од театарот се поставени 45 скулптури кои биле обележје и на Стариот театар.
![teatar skulpturi 8](http://faktor.mk/wp-content/uploads/2013/01/teatar-skulpturi-81-564x389.jpg)
Во влезната партија на главното фоаје на театарот ќе биде поставена и централна композиција – скулптура на основачите на театарот, што ја изработува уметникот Карадаре. Орнаментиката ќе биде поставена на ложите на главната театарска сала која прикажува мотиви од нашето културно наследство, цркви, манастири, артефакти.
“Театарот освен онаа главна функција, театарската дејност, ќе има и музејска функција. Сите посетители, преку целокупната орнаментика што е застапена во ентериерот, ќе можат да се запознаат со македонската култура и историја. Театарот ќе биде музеј сам за себе“, смета министерката.
Првично проектиран на 6 милиони евра-сега стигна до 20 милиони евра?!
![star teatar.](http://faktor.mk/wp-content/uploads/2013/01/star-teatar.1-564x423.jpg)
Стариот театар, објект дел од проектот “Скопје 2014“ почна да се гради на почетокот на 2007 година, според идејното решение на архитектот Јован Стефановски-Жан. Составен е од две сцени, главна сала со капацитет од 756 седишта и мала театарска сала проектира на за 236 седишта. Пред две години, покривот на Старо-новиот театар го зафати пожар, што е една од причините за пробивање на првично зацртаниот рок (летото 2012 година) за свечено пуштање во употреба.
Иако власта на почетокот на 2007 година изјавуваше дека објектот ќе чини 6 милиони евра, неговата вредност до сега се приближува до 20 милиони евра. Главен изведувач на Стариот театар е градежната компанија Бетон од Штип.
К.П.