Со 380 илјади евра Битола ќе поправа и обележува улици

Добивај вести на Viber

Во 2013 година, општина Битола планира да потроши 23,4 милиони денари (380 илјади евра) за обновување на патната мрежа, како и на сообраќајна сигнализација во градот. Од нив 10,9 милиони денари според програмата ќе се трошат на реконструкција на улици додека поголемиот дел од средствата или 12,5 милиони се планирани инвестиции за подобрување на хоризонталната и вертикалната сообраќајна сигнализација во општината.

За поквалитетен и побезбеден режим на сообраќајот во оваа година ќе бидат вложени 4 милиони за хоризонталната сигнализација на новоизградените улици и сообраќајници, како и за кружните текови во градот кои што ќе бидат стандардно обележани, 2,5 милиони денари ќе бидат искористени за поставување на нови и обновување на старите сообраќајни знаци и патоказни табли на подрачјето на општината. Oколу еден милион денари се планирани за одржување и поправка на постоечката светлосна сигнализација и семафори, а планирани се средства и за купување на друга опрема, информираат од општина Битола.

Како што појаснуваат од општината, обезбедувањето на потребните средства за реализација на програмата за одржување на комунални објкети и инсталации во 2013 година ќе се врши од буџетот на Агенцијата за државни патишта во Република Македонија, како и од надоместоци за комунална дејност.