Со ИПАРД средства до развој на руралниот туризам

Добивај вести на Viber

По низата програми за раст  и развој на земјоделството, сега треба да тргнеме со уште покрупни чекори преку градење објекти за доработка и преработка на земјоделски производи, изјави  заменик-министерот за земјоделство, шумарство и водостопанство Зоран Коњановски, за време на ИПАРД форумот „Нови измени во ИПАРД програмата  - подобри можности за користење на европските фондови“. Тој посочи дека со нови проекти треба да се искористат претпристапните европски средства преку ИПАРД програмата, која се отвара и за руралниот туризам.

„ Преку претпристапната помош ќе може да се вложува во руралниот туризам. Ќе имаме добра можност да им презентираме на сите оние што се заинтересирани за развој на руралниот туризам да можат да ги искористат европските средства, бидејќи преку ИПАРД програмата и одредени мерки има средства што може да се искористат за изградба на хотели, мотели во руралните средини со капацитет од 30 до 50 легла“, рече Коњановски.

Средствата, порача, треба што побргу да ги искористиме, со цел обезбедување дополнителни нови вработувања, но и нови вредности во руралниот туризам на Македонија.

Коњановски посочи дека од 2009 година  на Македонија и се на располагање европски средства и оти досега се реализирани седум јавни повици и се искористени се 15,5 милиони евра, наменети за развој на земјоделството.  Тој потсети и дека ресорното Министерство овозможи легализација на бесправно изградени објекти на земјоделско земјиште  со цел да можат да се извадат соодветни документи, градежна дозвола, и потоа лесно да ги користат европските средства.