Со оперативен план Антикорупциска ќе го следи изборниот период

Добивај вести на Viber

По денешното распишување на локалните избори Државната комисија за спречување на корупцијата утврди оперативен план за своето дејствување во целиот изборен период што трае од денот на донесувањето на одлуката за распишување на избори па до завршувањето на изборите. Според соопштението  ДКСК  укажува на обврските што произлегуваат од членот 11 на Законот за спречување на корупцијата. Во текот на изборниот период не можат да се користат буџетски средства на Република Македонија, средства од буџетите на општините и градот Скопје, од јавни фондови и средства на јавни претпријатија и јавни установи или правни лица што располагаат со државен капитал, освен ако тоа поинаку не е утврдено со закон со кој се уредува финансирањето на изборните кампањи на политичките партии, стои во соопштението. Исто така не може да започне изградба со средства од буџетот или од јавни фондови или со средства на јавни претпријатија или други правни лица што располагаат со државен капитал на нови објекти во инфраструктурата, како патишта, водоводи, далноводи, канализација и други објекти или на објекти за општествени дејности – училишта, градинки и други објекти, освен ако за таа намена претходно се обезбедени средства од буџетот, односно се работи за реализација на програма донесена врз основа на закон во тековната година. Не може да се врши никаква вонредна исплата на плати, пензии, социјална помош или други исплати на буџетски средства или средства од јавните фондови, ниту да се отуѓува државен капитал ниту да се потпишуваат колективни договори. Согласно членот 12 од Законот за спречување на корупцијата, ДКСК во своето соопштение истакнува дека ќе го следи целиот изборен процес и во случаите кога постојат основи за сомневање дека буџетските средства или средствата од јавните фондови или средствата од јавните претпријатија и јавни установи или други правни лица што располагаат со државен капитал, како и државниот капитал, се непосредно или посредно, користени за изборна кампања или воопшто за финансирање на изборна и друга политичка активност, ќе презема мерки за утврдување на таквите сомневања и ќе иницира постапки согласно надлежностите. Согласно тоа ќе ги извести надлежните органи и ќе бара преземање активности во рамките на нивните надлежности.