СООБРАЌАЈКА КАЈ УДОВО: ОЈО осомничи двајца виновници-за едниот се бара притвор

Добивај вести на Viber

Случајот за сообраќајната несреќа која се случи вчера утрово на магистралниот пат Демир Капија – Удово, кај месноста Света Петка, во која загинаа двајца сопружници од Скопје е во фаза на истрага.

Денеска од обвинителството информираа дека е почната постапка против две лица осомничени за сообраќајката.

Од обвинителството посочуваат дека од Основниот суд побарале притвор од осум дена за српскиот државјанин - 46-годишниот Д.С, додека за 60-годишниот Ѓ.В. наш државјанин се побарани мерки за претпазливост.

Анализата на надлежните институции ќе покаже кој е одговорен за незгодата во која седум годишно момче остана без родителите.

Да потсетиме...

Сообраќајната несреќа се случи вчера утрото, на магистралниот пат Демир Капија – Удово, кај месноста Света Петка, кога се судриле автомобил марка Ауди А4 со германски регистарски таблички, управуван од српскиот државјанин Д.С. (1970), автобус на „Струмица експрес“, управуван од Ѓ.В. (1956) и автомобил марка Фиат сеиченто со скопски регистарски таблички, управуван од Н.П. (1975 г.).

Во несреќата загинаа возачот на автомобилот и неговата сопруга, Б.П. (1984 г.), додека нивниот седумгодишен син е повреден и во критична состојба е префрлен на скопските клиники. Повредена е и сопатничката во аудито, германска државјанка, која со потешки повреди е задржана во Општата болница во Велес.