Спасовски: Државата не смее да биде поле од кое секој граба

Добивај вести на Viber

Техничкиот премиер Оливер Спасовски на денешната прес-конференција на новинарско прашање за измените и дополнувањата за Законот за минерални суровини рече дека познава уште десет оператори на кои треба да им биде одземена концесијата за геолошки експлоатации.

- Законско решение понуди решение во нормална постапка за кое ќе дискутираме сите заинтересирани. Сметавме дека треба при издавањето на договори за концесии да имаме добра направена анализа. Владата е должна да се грижи за јавниот интерес, а јас можам да набројам уште десетина концесии кои што не се почитуваат. Државата не смее да биде поле од кое секој може да граба од неа. Решенијата кои што ги нудиме, се отворени, транспарентни. и ние сме задолжени да го спроведеме тој закон. Нема никаква интенција за конфронтација со концесионерите, рече Спасовски.

Министерството за економија подолго време работеше за да се изнајде долгорочно решение во случај кога е загрозена безбедноста и здравјето на локалното население. Министерот за економија Крешник Бектеши денеска на заедничката прес-конференција со Спасовски рече дека државата со законските измени нема да се доведе во ризик да ги обештетува раскинувањата на концесиите.

- Сите концесионери треба да ги почитуваат елаборатотите за животна средина, а со новиот закон за минерални суровини тоа ќе може да се компензира, како што е примерот со каменоломите во Лабуниште и други локалитети. Да не биде дека ги раскинуваме еднострано како Влада, бидејќи може да изгубиме на Управен суд. Го обезбедуваме буџетот за да не плаќаме оштети какви што бараат „Еуромакс“ и „Казандол“. Во арбитражните постапки ќе победиме, нема да го оштетиме буџетот на државата, изјави Бектеши.

Со законските измени во иднина ќе се отвори можност за едностран раскин на договорот за концесија на рудниците во случај кога е загрозена безбедноста и здравјето на локалното население.