Србија: Ќе ја поддржуваме пријателската Македонија

Добивај вести на Viber

Српскиот претседател Томислав Николиќ изразил загриженост од предизвиците со кои се соочува Република Македонија.

Според него, Македонија ќе се соочи со предизвици поврзани со безбедноста, но Србија е подготвена да одговори на секаква закана. Николиќ зборувал со македонскиот претседател Ѓорге Иванов за време на форумот во Будва, Црна Гора. Српскиот претседател изразил поддршката од Србија за „пријателската Македонија, која се соочува со тешка внатрешна и политичка криза“.

„Времето што доаѓа, е многу чувствително и мора да бидеме подготвени за соодветна реакција со предизвиците поврзани со безбедноста. Србија има Копнена зона на безбедност и има подготвеност да одговори на секоја закана. Секој кој ќе се обиде да предизвика непријателска ситуација за Србија ќе биде изведен пред единствената армија и полицијата“, изјавил Николиќ.

Ѓорге Иванов го информирал Николиќ за сегашната ситуација во Македонија и мерките кои ги презема Владата на земјата.

„Ви благодариме за зборовите за поддршка. За нас е многу важно на север да имаме пријателска држава“, му кажал Иванов на Николиќ.

Двајцата претседатели ја оцениле како многу добра билатералната соработка, во духот на добрососедските и пријателски односи на двата блиски народа.

„Во последните три години политичкиот дијалог беше интензивен, длабок и квалитативен благодарение на средбите на високо ниво“, се вели во соопштението од кабинетот на српскиот претседател.