СРБИЈА: Само српски производи во камионите за извоз за Русија!

Добивај вести на Viber

Строги казни ќе следуваат за сите компании кои ќе се обидат да го злоупотребат извозот за Русија и да ја доведат во прашање српско-руската трговска соработка, предупредуваат српските власти во обид да ја искористат можноста што ја отвори руското ембарго за прехранбени производи од западните земји. „Имињата на сите компании кои ќе ја злоупотребат оваа можност ќе бидат јавно објавени, а за нив ќе следуваат строги казни. Мора да бидеме повеќе организирани. Ќе формираме координативно тело, кое на дневна основа ќе ги решава сите потенцијални проблеми“, најави министерот за трговија Расим Љајиќ, кој денеска оствари средба со сите поголеми српски извозници во Русија. Целта на состанокот беше да се испитаат можностите за искористување на руското ембарго кон западните земји за да се зголеми српскиот извоз во Русија. Притоа, казни ќе има и за сите компании кои ќе препакуваат стока од странство и ќе ја реекспортираат во Русија. „Камионите кои возат за Русија можат да бидат и полупразни, но во нив смее да има само српски производи“, категоричен е министерот и најавува засилени инспекции за ова. До српските власти во изминатите неколку дена стигнале понуди од десетици европски компании кои се обидуваат да го заобиколат руското ембарго со реекспорт преку Србија, но од Србија добиле одговор - тоа не е можно. „Ние им кажавме дека тоа не е можно и оти единствено можат да отворат или да купат фирма во Србија и притоа да ги извезуваат само производите произведени во Србија“, категоричен е Љајиќ. Србија е една од земјите на која руските власти сметаат при увозот на храна, а клучот при тоа е да се одржи имиџот и довербата.