Србија се мобилизира за да ја искористи шансата за зголемен извоз во Русија

Добивај вести на Viber

Српскиот министер за трговија, туризам и телекомуникации Расим Љајиќ за в понеделник закажа состанок со сите поголеми извозници на храна во Русија, како и со претставници на Министерството за земјоделство и на царинските служби. Целта на состанокот е са се одбегнат сите потенцијални проблеми во извозот за Русија, со цел да се искористи периодот кога Москва воведе ембарго на производите од САД, ЕУ, Норвешка, Канада и Австралија. Според Љајиќ, проблеми и пропусти како неодамнешниот извоз на свинско месо со листерија, кој се закануваше во целост да го блокира извозот на храна од Србија за Русија, нема да се толерираат. „Секој што ќе се обиде на кој било начин оваа шанса да ја доведе во прашање ќе биде најстрого санкциониран“, рече Љајиќ. Според првичните проценки, Србија на извозот на храна во Русија до крајот на годината би можела да заработи дополнителни 180 милиони долари, што ќе претставува скок од 70% во однос на лани. Надлежните предупредуваат дека производителите и извозниците мора да ја искористат шансата настаната со воведување на руските санкции за Западот, но и мора да знаат дека на рускиор пазар владеат строги правила. Во моментот, индустријата за зејтин во Србија работи со 50% од капацитетите, кондиторската - со 40%, индустријата за месо со 30%, а шеќерната индустрија само со 25% од капацитетите. Надежите се дека извозот кон Русија може значително да ги зголеми тие проценти. Што ќе јаде Русија по санкциите – полиците веќе се празнат!