СРЕДБА ЗАЕВ - БУТАРИС: Што констатираа за Договорот од Преспа?

Добивај вести на Viber

Премиерот Зоран Заев, имаше средба со солунскиот градоначалник Јанис Бутарис, при што е констатирано дека се остварени заложбите на премиерот Заев и на солунскиот градоначалник за пријателство меѓу граѓаните на двете држави, низ политики на искрена меѓусебна соработка и доверба, уште пред потпишувањето на договорот од Преспа.

Оценето е дека политиките на конфликт значат загуба за две страни, исто како што заедничките обиди за изнаоѓање решение, значат придобивка за двете страни.
Премиерот Заев рече дека солунскиот градоначалник Бутарис, кој е голем пријател на нашата држава, е вграден во постигнатиот преспански договор.

„Денес, нашите две држави имаат голема иднина пред себе, со многу можности. Договорот од Преспа е стратешко партнерство за области значајни за граѓаните на двете земји. Придобивките веќе се чувствуваат, преку соработката во земјоделството, енергетиката, новите инвестиции, соработката на бизнис-заедниците, размената на искуства во областа на екологијата и туризмот, заложбите за олеснувања на граничните премини. Од воспоставените добрососедски односи имаме само бенефити. А начинот на доаѓање до решение, низ искрен дијалог, за чувствителни прашања, што се постигна со договорот од Преспа е придобивка на целиот регион“, вели Заев.

Констатирано е дека ќе биде запаметено, дека во специфични политички околности имаше луѓе кои поддржуваа дијалог што е база на денешните воспоставени добрососедски односи.

На состанокот е заклучено дека отворените перспективи меѓу државите и соработката меѓу градовите допрва ќе ги даде вистинските позитивни резултати.