Српската економија со раст помал од очекуваниот

Добивај вести на Viber

Се очекува економијата на Србија да порасне за 2,8 проценти во 2025 година, според проценката на Светската банка (СБ) објавена денеска, што е за 0,7 проценти помалку од очекувањата на банката објавени во пролетта.

„По добрите резултати во 2024 година, економијата го изгуби моментумот поради пониските нивоа на приватни инвестиции и нето прилив на странски директни инвестиции во услови на глобална неизвесност“, се вели во соопштението на СБ.

Светската банка прогнозира дека во следните неколку години Србија ќе постигне економски раст од околу три до четири проценти годишно, што е исто така ревизија надолу од податоците што банката ги презентираше напролет оваа година. Сега се очекува дека следната година растот на економијата ќе биде три проценти, односно 0,9 проценти помалку од првичниот, а четири проценти за 2027 година, односно 0,2 проценти помал.

Како што објаснуваат аналитичарите на СБ, растот се забави на околу два проценти во првата половина од 2025 година поради остриот пад на градежната активност и послабиот земјоделски резултат, кој беше под влијание на негативните климатски шокови.

Во првата половина од 2025 година, учеството на фискалниот дефицит во годишниот БДП остана на многу ниско ниво од 0,2 проценти, јавниот долг продолжи да се намалува, достигнувајќи 45 проценти од БДП, а дефицитот на тековната сметка се зголеми за 82 проценти (на 2,3 проценти од БДП), бидејќи увозот и на стоки и на услуги растеше побрзо од извозот, како и поради помалиот нето прилив на дознаки, велат од СБ.

На пазарот на трудот, стапката на невработеност продолжи да се намалува, и на крајот на јуни беше во просек од 8,8 проценти, додека стапката на вработеност остана на рекордни 51,6 проценти.
Меѓу негативните ризици за економскиот раст, економистите на СБ ги издвојуваат потенцијалната буџетска поддршка за државните претпријатија што се соочуваат со тешкотии во работењето, послабата надворешна побарувачка за извоз од Србија во услови на глобална неизвесност во областа на трговската политика, како и влијанието на екстремните временски настани врз земјоделството и инфраструктурата.

Според очекувањата, инфлацијата ќе се врати на средината од целниот опсег на Народната банка на Србија во 2027 година. 

Одржливиот економски раст, со подобро насочена и посоодветна социјална помош, останува клучен за понатамошно намалување на сиромаштијата, оцени Светската банка.