Стартува доброволниот откуп на државните обврзници во Грција

Добивај вести на Viber

Грчката Агенција за управување со долгови (ПДМА) денеска соопшти дека отпочнала доброволен откуп на државни обврзници по значително намалени цени, што е услов за прием на најновата транша од заемот од Европската унија и Меѓународниот монетерен фонд.

Во соопштението се наведува дека квалификуваните сопственици на обврзници се повикуваат до петок да ги достават грчките должнички хартии од вредност за да им се исплати меѓу 32,2 и 40,1 отсто од нивната номинална вредност, пренесуваат агенциите.

Во замена за старите хартии од вредност на учесниците во повикот ќе им бидат врачени нови шестмесечни записи, што ги издава Европскиот фонд за финансиска стабилност (ЕФСФ), со вкупна вредност до 10 милијарди евра.

Грчките приватни кредитори во март веќе се согласија на отпис на околу 107 милијарди евра од грчкиот јавен долг, а бројни банки и осигурителни компании во целост ги отпишаа побарувањата на име на грчките обврзници во своја сопственост.

ЕУ и ММФ минатата недела договорија ослободување на 43,7 милијарди евра во четири транши од декември до март, што на Грција ќе и овозможи да го избегне банкротот.