Стефан Богоев: Проверете зошто вечерта немало обезбедување и која е конекцијата на фамилијата Алабаковски
Објавено во: Македонија 10 Јуни, 2022
Стефан Богоев, еден од потпретседателите на СДСМ, синоќа во гостувањето во емисијата „24 анализа“ постави прашање со кое алудираше дека Агенцијата за обезбедување на клубот „Иван Михајлов“ во Битола е на сопственици блиски до ВМРО-ДПМНЕ, а разузнавачки структури од оваа партија биле поврзани со фамилијата на Ламбе Алабаковски.
Пејачот беше уапсен за потпалување на влезот на контроверзниот културен центар, а синоќа беше пуштен во домашен притвор.
„Проверете, која и чија е Агенцијата за обезбедување најмена да го чува центарот ‘Ванчо Михајлов’. Дали сопственичката структура е блиско поврзана со поранешни и сегашни активности на ВМРО-ДПМНЕ? Зошто во тоа време се тргнал обезбедувачот? Каква е конекцијата на Алабаковски фамилијарно, со разузнавачки структури блиски до ВМРО-ДПМНЕ? И проверете, два дена пред пожарот кој поранешен министер од безбедносните структури, припадник на ВМРО-ДПМНЕ, со кој тим се сретнал во Прилеп, соседен град на Битола, и дали тоа има никаква поврзаност со Агенцијата за обезбедување која што магично исчезнува во моментот кога магично невиниот Ламбе Алабаковски се решава да го запали центарот? Од друга страна, ова реков да го проверите, не констатирам ништо“, рече Богоев.
При тоа, поранешниот градоначалник на Карпош рече дека ги знае одговорите Јавното обвинителство во Битола досега отвори постапка само за кривичното дело - Предизвикување општа опасност, поради основано сомнение дека Алабаковски истурил бензин врз влезната врата од Културниот центар, ставил фитил на прагот и го запалил.