Странците навалија на Хрватска, што се бара и кој купува недвижен имот?

Добивај вести на Viber

Луксузните вили се најбарани, Словенците се странците кои најмногу купуваат во Хрватска, за Македонија пак важат малку поинакви правила на игра ако некој се реши да си купи имот во Хрватска. По потпишувањето на Спогодбата за стабилизација и асоцијација, Хрватска презеде обврска за либерализација на пазарот на недвижности во однос на државјаните на Европската унија, во насока на нивно изедначување со хрватските граѓани. Така од февруари 2009-та година за граѓаните и правните лица од земјите членки на ЕУ се укинати посебните услови и тие се рамноправни граѓани на Хрватска по однос на стекнување на имот. Сепак, граѓаните на ЕУ се уште не можат да стекнат сопственост над недвижен имот во одредени области како што е заштитеното земјоделско земјиште или природни области. Странците кои не се државјани на земја-членка на ЕУ, за да купат имот во Хрватска бараат одобрение од страна на Министерството за правда, кое е достапно само за граѓаните на оние земји со кои Хрватска има потпишано договор за реципроцитет.Исклучок се оние странци кои веќе отвориле фирма во Хрватска, па за нив е полесно бидејќи имотот го купуваат на име на фирмата. Според официјалните податоци од 2010-та, 5445 странски државјани се стекнале со имот, за во 2011-та бројката да падне на 5.087. Купувањето на недвижен имот од странски државјани секако го прати негативниот тренд во хрватскиот пазар на недвижности, така што според непотполните податоци на Даночната Управа, во споредба со 2011-та, во  2012-та има за 35%  помалку купопродажби од странски државјани. Сепак, посочуваат познавачите на состојбите, мора да се има во предвид овие податоци се однесуваат само на странските купувачи кои според принципот на реципроцитет стекнале сопственост на недвижен имот во Хрватска. Статистика не ги опфаќа странските државјани, кои за стекнување на недвижен имот во Хрватска, ја користат  "дупката" која им овозможува имотот да го купат на име на фирмата регистрирана во Хрватска, па така да се избегнат правните бариери и трошоците за данок на недвижен имот. Словенците први на листата Според податоците од даночната администрација, најмногу недвижен имот во Хрватска во последните три години, вкупно 13 883 имоти купиле државјани на Словенија - дури 40,86% од вкупната бројка. По нив следат Германците и Италијанците со 12,66% односно 11,34% од вкупната продажба. Интерес за инвестирање во недвижен имот во Хрватска има за деловни и туристички објекти, но исто така и за изградба на апартмани и станбен простор. Странските државјани, исто како и домашните купувачи бараат поволни имоти на атрактивна локација. Локацијата е најважна, независно од тоа дали станува збор за земјиште, постоечки објект или постар дом на кој му треба целосна реконструкција. Но, исто така многу е важно и цената да е реална,  па купувачите вработуваат специјални консултанти да го анализираат до детали пазарот, локацијата, околностите, можностите. Во зависност од целта на купувањето недвижен имот, постојат два типа на имот купувачите, велат познавачите. Едната група се странските државјани кои купуваат за инвестирање. Тие бараат помош од агенциите и главно купуваат имоти во крајбрежните области со туристичкиот потенцијал за станови и деловни простории во центарот на големите градови. Втората група пак, се странците кои сакаат нов дом, па тие честопати сами шетаат низ Хрватска додека не ја најдат својата идеална локација. Најголем број од странците купуваат на брегот, главно куќи и вили во Дубровник, Сплит, Опатија, на островите. Истра е синоним за луксуз и елитен туризам, па овде интерес за купување на недвижен имот покажуваат Русите, Британците, Италијанците и Словенците. Општо земено, посочуваат од Агенциите за недвижности, странците главно бараат луксузни вили, на прв ред до морето, на пространи парцели со неверојатен поглед на зеленилото, со базен, тениски терени и други погодности. Освен од брегот, атрактивен за странците е и Загреб како главен град, политички, финансиски и трговски центар, и тоа најмногу кога треба да купува канцелариски простор. Со оглед дека повеќето странски државјани купуваат недвижности на брегот, Хрватска се натпреварува со земјите со медитеранска клима. Голем ривал е Шпанија каде што цените поради кризата доживеаја голем пад на цените. Апсолутен хит на пазарот е црногорскиот брег, и се поотворените Црногорци кон привлекување инвестиции и странски државјани. J.J.