СТРАВ ОД НОВО ЦУНАМИ: Претходниот удар уби 300 луѓе

Индонезија стравува од ново цунами. 

Цунамито во саботата однесе околу 300 жртви, а над 1000 се повредени. 

Вулканот Анак Кракатау во Индонезија сега е активен, а на населението во подрачјето им е издадено предупредување за можно ново цунами. Од Националната агенција за природни катастрофи им препорачаа на жителите да не приоѓаат во крајбрежните делови. Индонезиските власти велат дека немало брзо предупредување од цунами затоа што системот за рано предупредување е опремен да реагира на земјотреси, а цунамито било предизвикано поради подводно лизгање на земјиштето предизвикано од ерупцијата на вулканот. Штетата е огромна, а спасувачките екипи бараат евентуално преживеани. ОН и ЕУ испраќаат хуманитарна помош во погодените региони. Најзагрозено е населението во близина на вулканот.

Отворени се голем број прифатни центри за над 11 илјади евакуирани лица. Претседателот на Индонезија, Јоко Видодо ги посети местата погодени од цунамито и повика на смиреност.

Цунамито удрило во вечерните часови за време на локален празник, откако не било забележано повлекување на морската вода, како што е случај при земјотреси.

Анак Кракатау настана во 1927 година, по ерупцијата на вулканот Кракатау. Последниве 6 месеци има зголемена активност, а на жителите повеќе пати им е дадено предупредување да ја избегнуваат областа во близина на кратерот.