СТУДИИ ПОКАЖАА - над 95 отсто од починатите во Европа имале над 60 години, но „заглавуваат“ и помлади со други болести

Добивај вести на Viber

Раководителот на Канцеларијата на Светската здравствена организација во Европа изјавил дека бројките покажуваат дека повеќе од 95 отсто од луѓето кои починале од коронавирус на континентот, се на возраст од над 60 години.

Но, д-р Ханс Клуж вели дека возраста не е единствениот фактор на ризик за тешка болест, додавајќи: „Самата претстава дека КОВИД-19 влијае само на постарите луѓе е всушност погрешна“.

На конференцијата за печатот на Интернет во четвртокот во Копенхаген, Клуж рече дека „младите луѓе не се непобедливи“ - откако такви слични коментари неодамна имаше и од генералниот директор на СЗО, Тедрос Адханом Гебрејесус.

Здравствената организација на Обединетите нации вели дека 10 до 15 отсто од луѓето под 50 години кои имаат друга болест, имаат умерена или тешка инфекција.

„Тешки случаи на заболување се забележани кај луѓе во своите тинејџерски години или во 20-тите години, од кои многумина имаат потреба од интензивна нега, а некои за жал починаа“, рече Клуж.

Според него, неодамнешните статистики покажуваат дека 30.098 луѓе се пријавени како починати во Европа, претежно во Италија, Франција и Шпанија.

„Знаеме дека над 95 проценти од овие смртни случаи се случиле кај постари од 60 години“, рече тој, а од нив повеќе од половина се на возраст од над 80 години.

Клуж рече дека повеќе од четири од пет од овие луѓе имаат барем една друга хронична состојба, која била скриена, како што се кардиоваскуларни заболувања, хипертензија или дијабетес.

„Како позитивна нота, пак, е тоа што има извештаи за луѓе над 100 години, кои биле примени во болница за КОВИД-19, но после тоа тие успеале целосно да закрепнат“, вели овој доктор.