Добивај вести на Viber
Со должина од 3,6 километри, ширина од 6 метри и потрошени 24 милиони денари, во Општина Аеродром денеска беше пуштен во употреба санираниот пат што ги поврзува двете населби Горно и Долно Лисиче. Парите за патот беа безбедени од Европската банка за обнова и развој, а го направи општината во соработка со Агенцијата за државни патишта, и со Министерството за транспорт и врски.
„По патот претходно не можеше да се движат автомобили кога имаше поголема количина вода, а имаше и големи дупки. Во еден период имаше и забрана за движење на автобуси. Станува збор за инвестиција од 400 илјади евра. Овој пат е само еден од стотината што се реализирани во последниот период“, изјави министерот за транспорт и врски Миле Јанакиески кој заедно со градоначалникот на Општина Аеродром Ивица Коневски се појави на официјалното пуштање во употреба на патот.
За Коневски, ова е многу важен пат за општината и за Горно и Долно Лисиче, а пуштањето во употреба ќе овозможи побрза сообраќајна комуникација со останатите делови од градот.