СВЕТСКИОТ БРОЈАЧ НЕ ЗАСТАНУВА: 15.000 починати и над 350.000 заразени со коронавирусот

Добивај вести на Viber

Од минута во минута расте бројот на заболени од коронавирусот. Светскиот бројач, во моментов покажува 351. 530 инфицирани, а поразителен е и бројот на починати на глобално ниво, досега 15.361.

На европското тло, кое во моментов е жариште на пандемијата, најсмртоносниот ден го доживеа Шпанија. Во последните 24 часа, таму има 462 починати луѓе. Шпанското минитерство за здравство информира дека во земјата се регистрирани 33.089 заразени, што е дури за 4.517 повеќе во однос на вчерашниот ден. Најсериозно е се уште во Италија, земјата која во моментов е епицентарот на Ковид-19. Бројот на заразени тами се приближува кон 60.000, 5.476 лица починале, но загрижува бројот на луѓето кои се во критична состојба. Здравствените власти во Италија велат дека дури 3000 пациенти се во тешка здравствена состојба.

На Балканот, пикот се очекува во текот на следниот месец, но здравствените власти секаде воведуваат драстични мерки. Полицискиот час во Србија, наместо од 20 до 5 часот, ќе трае од 17 до 5 часот. Ако има потреба и граѓаните не бидат послушни, српскиот претседател Александар Вучиќ најави дека ќе има уште поголемо зголемување на полицискиот час, па единствениот период од денот кога ќе можат да се движат Србите надвор ќе биде од 7 до 13 часот. Од понеделник, според најавите, Србија ќе го пренамени Белградскиот саем во привремена болница и во него ќе бидат наместени 3.000 кревети.

Во Албанија веќе стапи во сила ограничување на движењето на луѓето во согласност со мерките на Владата. Премиерот Еди Рама изјави дека од сабота во 13 часот до понеделник, не смее никој да биде на улица освен војската.
Припадници на албанската армија се ангажирани да го спречат честото движење на луѓето низ улиците во главниот град Тирана, која е главното жариште на коронавирусот во земјата.