СЗО ги повика сите држави да наметнат данок на „шеќер“
Објавено во: Свет 11 Октомври, 2016
Светската здравствена организација (СЗО) повика сите земји во светот да разговараат за воведување на данок на безалкохолните пијалоци, пишува Гардијан.
Во организацијата сметаат дека данокот за „шеќер“ би бил ефективен начин за справување со дебелината, особено меѓу децата. Советот на СЗО доаѓа во позадина на информациите дека се повеќе и повеќе земји размислуваат за прифаќање на фискални мерки, за да се принудат луѓето да го намалат конзумирањето на големи количини безалкохолни пијалоци кои се определени како главната причина за прекумерната тежина и дебелината во светот.
Во извештај на Светската здравствена организација се вели дека данок од 20% или повисок ќе доведе до пад на продажба и потрошувачката на пијалоци со шеќер.
Организацијата исто така смета дека тоа ќе помогне за намалување на трошоците во здравството и ќе се зголемат приходите за инвестирање во оваа област.
СЗО нагласува дека данокот треба да покаже најголемо влијание врз младите, оние со ниски приходи и други кои консумираат многу безалкохолни пијалоци.
Како други фискални мерки се наведуваат: субвенционирање на свежо овошје и зеленчук со 10 - 30% и зголемување на данокот на храна со прекумерно многу сол, трансмасти и шеќер.