Тајна средба Ковачевски - Ахмети - Гаши во Владата
Објавено во: Македонија 26 Јануари, 2023
Извори на Телевизија 24 велат дека во Владата имало тајна средба на која премиерот Димитар: Ковачевски и лидерот на ДУИ, Али Ахмети, го убедувале третиот коалиционен партнер - Африм Гаши, претседателот на Алтернатива, дека Алијанса за Албанците треба да влезе во владеачкото мнозинство за да го стабилизира и наедно да се обезбеди постојан кворум во блокираното Собрание.
Гаши не бил убеден во овие мотиви и рекол дека „тој што му гори под нозе, да му отстапи министерства на Алијанса“, алудирајќи на ДУИ каде што голем притисок прави т.н.„Огнена група“.
Средбата се одржала во кабинетот на Ковачевски, а информацијата ја потврдува висок партиски функционер од Алтернатива. Гаши прашал која е потребата од влегувањето на Алсијанса за Албанците во Владата и ги потсетил коалициските партнери дека токму тој и Алтернатива кога било најгусто ја спасиле Владата на сметка на нивниот рејтинг, но и дека дел од нивниот договор се уште не го исполниле и дека се уште не се поставени 15 договорени кадровски решенија.
Не се исклучува денеска повторно владејачката тројка да се види во Собранието бидејќи Ковачевски ќе биде на пратенички прашања, а Ахмети и Гаши се пратеници.