ТРГОВСКИТЕ ОДНОСИ И ДОЛАРОТ ВЛИЈААТ НА ЦЕНИТЕ: Колку чини барел нафта?

Добивај вести на Viber

Цените на нафтата се близу 67 долари, a инвеститорите чекаат реакција од ОПЕК+. 

Цените денеска на меѓународните пазари се задржаа близу 67 долари, во очекување на состанокот на водечките производители и сигнали дека тие би можеле да ја зголемат понудата на крајот од летото.

На лондонскиот пазар, попладне, цената на барел за испорака во септември беше речиси иста како и на вчерашното затворање на тргувањето, на 66,91 долари. Тргувањето со барели за испорака во август вчера заврши на 67,61 долари.

На американскиот пазар, денеска со барел нафта се тргуваше за 30 центи повисоко, на 65,41 долари.

Очекувања од состанокот на ОПЕК+

Вниманието на трговците се префрли на состанокот на Организацијата на земјите извознички на нафта (ОПЕК) и нејзините сојузници откако стивна загриженоста за понудата од Блискиот Исток.

„Се очекува ОПЕК+ да ја продолжи својата одлука за зголемување на понудата за 411.000 барели дневно до август“, изјави Оле Хансен од Саксо банка, повикувајќи се на изјавите на четири неименувани делегати во групата минатиот петок.

Доколку продолжи со ова темпо, групата би ја зголемила понудата за вкупно 1,78 милиони барели дневно оваа година, што одговара на повеќе од 1,5 проценти од глобалната побарувачка.

Трговските односи и движењата на доларот влијаат на цените

Претседателот на САД, Доналд Трамп, објави царина од 10 проценти за увоз од земји ширум светот на почетокот на април и сигнализираше „реципрочни“ царини за трговските партнери кои континуирано бележат суфицит во трговијата со САД.

Трамп постави рок од 90 дена за преговори, кој истекува следната недела, но во меѓувреме посочи дека може повторно да го продолжи.

Цените на нафтата денес беа поддржани и од послабиот долар, бидејќи тоа значи поголема куповна моќ за инвеститорите со други валути, а со тоа и посилна побарувачка.