Цената на енергенсите-мерка за собирање политички поени во Хрватска

Добивај вести на Viber

Хрватската влада вчера го усвои нацрт-законот за регулирање на енергетските дејности со кој на Регулаторната агенција за енергетика и се даваат значително поголеми овластувања за корекција на цените на енергијата. Во надлежност на Агенцијата досега беше донесувањето на методологијата и тарифниот систем, како и усвојувањето или одобрување на цените на енергенсите, тарифни ставки и бенефиции. Во контекст на усогласување на хрватското законодавство со третиот пакет регулативи на енергенсите од страна на ЕУ, Регулаторната агенција ќе добие многу поголема автономија во однос на Владата и другите институции, со што треба да биде заштитена од влијанието на останатите јавни и приватни субјекти врз енергетскиот сектор, истакна министерот за економија Радимир Чачиќ. За премиерот Зоран Милановиќ, ова не е бегање на Владата од одговорноста за трошоците за енергија, но како што вели тој, ако се застане на патот на пазарната економија, тоа на крајот ќе заврши лошо, нешто што почна да се случува во Хрватска. Според него, Владата не може да биде одговорна за движењата на цените на енергијата на светскиот пазар, а ако интервенира премногу, тоа би довело до акумулација на долгови и загуби. „Не постои оправдување кога за цената на греењето, некои се прават наивни, а други плаќаат премногу. Не постои оправдување цената да е повисока во Вуковар, а во Загреб значително пониска поради некакви  политички комбинаторики “, рече Милановиќ додавајќи дека треба да им се помогне на сиромашните кои не можат да ја платат цената, но не и да се дозволат политички манипулации.