Ципрас: Ако Грција ја напушти, ќе дојде крај на еврозоната

Добивај вести на Viber

Грција може да постигне договор со меѓународните кредитори, ако тие се откажат од неколку свои сегашни реформи, вклучувајќи го и кратењето на пензиите, изјавил грчкиот премиер Алексис Ципрас во денешно интервју за италијанскиот весник „Кориере дела сера“.

Одразувајќи повеќе попустлив тон на Атина во последните денови, Ципрас истакнал дека двете раскарани страни можат да најдат компромис за основните елементи на секој еден договор, вклучувајќи и по прашањето за големината на примарниот буџетски суфицит. Но, во исто време тој не даде никакви знаци на повлекување за барањата на кредиторите за намалување на пензиите или на други социјални трошоци.

„Мислам дека сме многу блиску до договор за примарниот суфицит на земјата во следните неколку години. Само треба да имаме позитивен став во однос на алтернативните предлози за намалувањето на пензиите или на наметнување на нови рецесионни мерки“, изјавил Ципрас за италијанското издание.

Коментарите на грчкиот премиер се факт во момент кога меѓународните партнери на Грција, вклучувајќи ја и германската канцеларка Ангела Меркел и претставниците на ЕЦБ ги предупредија дека времето за постигнување договор истекува многу брзо.

Ципрас ќе се сретне со Меркел и со францускиот претседател Франсоа Оланд во среда, за да се обиде да направи пробив во најтешките преговори кои ги засилуваат стравувањата дека Грција може да биде принудена да ја напушти еврозоната и тоа може да има непредвидливи последици за единствената валута и во поширокиот план - за целата светска економија.

Ние не можеме да продолжиме со спроведувањето на програма која очигледно не успеа, истакнал Ципрас.

Ќор-сокак во преговорите, кој траеше со месеци, доведе до зголемување на шпекулациите дека европските партнери на Грција можат да покажат тенденција на едно принудно излегување на земјата од еврото и од еврозоната, повикувајќи се на серијата „firewalls“ и механизми, изградени во последните години чија цел е ограничување на т.н. „Заразен ефект“ од едно такво решение.

Ципрас, меѓутоа, изјавил дека е уверен дека меѓународните кредитори ќе се откажат од слични намери за „евентуално сценарио „Grexit“ ќе биде почетокот на крајот на еврозоната. Ако Грција успее, финансиските пазари веднаш ќе почнат да ја бараат следната жртва. Ако преговорите пропаднат, трошоците за европските даночни обврзници ќе бидат огромни“, предупредил тој.