Ципрас инсистира грчкиот парламент да го одобри договорот во четвртокот

Добивај вести на Viber

Грчкиот премиер Алексис Ципрас побарал од парламентот да се соберат за да го одобрат договорот со кредиторите во вредност од околу 85 милијарди евра до четврток, пренесоа светските агенции.

Во писмото испратено до претседателката на парламентот, Ципрас наведува дека сака законот во договорот, кој ќе биде доставен подоцна денес, да биде поделен на пратениците, тие да го дискутираат во парламентарна комисија во средата и да биде изгласан во четвртокот.

Ципрас истакнува дека моментот е одлучувачки за земјата и бара итно свикување на парламентот за пристапување кон одобрување на договорот. Ова ќе овозможи доделување на првата транша од помошта, потсетува грчкиот премиер.

Грција сака договорот да биде ратификуван од парламентот, за да може на состанокот во петокот министрите за финансии од еврозоната да го одобрат и Грција да ја добие првата транша од помошта навреме за плаќање кон Европската централна банка до 20 август, забележуваат агенциите.

Рано утринава министерот за финансии Евклид Цакалотос објавил дека е постигнат договор со меѓународните кредитори, со што се зголемува самодовербата дека Грција ќе остане во заедничката валута.

Европската комисија, меѓутоа, прецизира дека има само „договор во принцип на техничка основа“ и дека чека политичко одобрување допрва. Портпаролка во Брисел изјавила дека станува збор за технички договор, постигнат од грчкиот тим и од преговарачите од името на европските институции.

Таа додаде дека преостанатите детали за објаснување, вклучувајќи ја приватизацијата на фондот од 50 милијарди евра, кој се очекува да биде формиран во Атина, ќе бидат расчистени до крајот на денот.

Осврнувајќи се на привремена природа на договореното, претставничката на Брисел одби да ја прецизира и големината на новата тригодишна програма, која може да се движи од 82 до 86 милијарди евра.

„Она што недостасува во моментов, за да објавиме дека има нова спасувачка програма, е политичкото одобрение за постигнатите договори“, изјавила портпаролката на Комисијата.

Грција има потреба од нова финансиска трансфузија пред 20 август, кога ќе треба да плати 3,2 милијарди евра на Европската централна банка. Затоа Еврокомисијата инсистира одобрување на договорот што треба да помине и низ парламентот, вклучувајќи го германскиот, да биде завршена до 20 август или во краен случај - до крајот на месецот.

Техничките преговори во Атина помеѓу грчката влада и меѓународните кредитори - ММФ, ЕЦБ и Европската комисија започнаа на 27 јули.