Тунески: Ќе дојдат петорица Грци и ќе ни го земат „Тиквеш“ и Црна Река

Добивај вести на Viber

Професорот Атанаско Тунески во емисијата „Утринска“ на Телма упашти уште еднаш апел до надлежните да не го даваат проектот „Чебрен“ на странски инвеститор, затоа што, како што кажа тој, би ја загубиле и хидроцентралата Тиквеш и Црна Река.

„Ќе донесат петорица Грци, ќе соберат пари, кајмак, вода, се ќе соберат. Тоа ќе значи дека наместо досегашните 8 милиони евра, од ХЕЦ Тиквеш струјата ќе ни ја продаваат за 40 милиони евра. Одма ќе се зголеми цената. Таа струја сега што ја користиме, е дел од Тиквеш, сега не чини X, а ќе не чини понатаму 5Х. Кој ќе го плати тоа, ако не народот“, рече поранешниот член на Регулаторна комисија за енергетика во студиото.

Тој дополни дека и порано имало идеја да се даде „Чебрен“ на странци, но иако понудата била подобра, ниту тоа не било прифатливо.

„Германците понудија 49 отсто од струјата за нас, не од ќарот, а концесијата беше 39 години, а сега треба да се даде на 60 години. Беше одбиена затоа што не беше добра ниту таа понуда. Концесија од 60 години е многу. Ќе има многу што не се ни родени, а нема да доживеат до тогаш. Секој ден ќе му даваме по 100.000 евра некому екстра, а тоа не се мали пари“, смета порнешниот директор на МЕПСО.

Тој го повика Министерството за животна средина да не го потпишува договорот за концесија со грчката ЕПП Архиродон.

„Како ќе потпишат, кога е спротивно на европските закони за животна средина, спротивно на Бернската конвенција за биодиверзитет, со толку висока брана“, прашува Тунески.

Тој додаде и дека дистрибутивната цена на струјата во Македонија е највисока во споредба со останатите дистрибутивни цени во регионот.