Турци, Украинци и Македонци заинтересирани за гасификацијата на Скопје

Добивај вести на Viber

Турската компанија „Аксо енерџи“, како и една украинска и една македонска компанија досега подигнале тендерска документација за учество на тендерот за гасификација на Скопје. Имињата на украинската и на македонската компанија се уште не се откриваат. Сепак, подигањето на тендерската документација е само прва фаза, која не гарантира дека заинтересираните компании конечно ќе аплицираат на тендерот. Конечните пријави треба да се достават најдоцна до 25 мај, а потоа ќе следи подолг период на евалуација на понудите. Гассификацијата е предвидено да се изведува по принципот на јавно-приватно партнерство - фирмата која ќе ја добие концесијата треба да ја изгради мрежата, да ја проектира, финансира и одржува 20 години, а потоа да ја отстапи на државата. Примарната гасоводна мрежа во Скопје треба да биде долга 250 километри и да ги опфати сите скопски општини, а се проценува дека реализацијата на проектот ќе чини 98,4 милиони евра. Изградбата на гасоводот е предвидено да трае од 2015 до 2019 година, со тоа што дел од инфраструктурата би била пуштена за користење веќе во 2016 година.